काठमाडौं । उपभोक्ता समितिका पदाधिकारीलाई अपहरण गरेको आरोपमा लिखु तामाकोसी गाउँपालिकाका अध्यक्ष गोविन्दबहादुर खड्का पक्राउ परेका छन् । खड्काले लिखु तामाकोशी वडा नम्बर ७ की वडा सदस्य सजिना बुढाथोकी लगायतका उपभोक्ता समितिका पदाधिकारीलाई ढोका थुनेर चेकमा सही गराएको उजुरी जिल्ला प्रहरी कार्यालय रामेछापमा परेपछि उनलाई पक्राउ गरिएको समाचार छ । बुढाथोकी लगायतका उपभोक्ता समितिका पदाधिकारीलाई जबर्जस्ती चेकमा सही गराएर खड्काले नै बैंकबाट साटेका थिए ।
जिल्ला प्रहरी कार्यालय रामेछापका डीएसपी बसन्त पाठकले शरीर बन्धक बनाएर खाली चेकमा हस्ताक्षर गर्न लगाएको उजुरी आएपछि पक्राउ गरेको जानकारी दिएका छन् ।
पक्राउ अभियुक्त खड्कालाई शरीर बन्धकको कसुरमा म्यादथप गरी अनुसन्धान बढाइने डीएसपी पाठकले बताए ।
अध्यक्ष खड्कामाथि लिखु तामाकोशी १ दुरागाउँमा विद्युतीकरण गर्दा ५ करोड भन्दा बढी भ्रष्टाचार गरेको आरोप पनि लागेको छ । अति नै सनकी स्वभावका उनले उपाध्यक्ष दिपशिखा दाहाल र वडा नम्बर ७ का वडाध्यक्ष सुवास बोहरालाई पनि झुटा उजुरी दिएर मुद्दा दायर गरी दुःख दिइरहेका छन् । उनका कारण लिखुतामाकोशीको विकास नै अवरुद्ध भएको छ ।
