प्रदेश २ मा सरकार परिवर्तनको तयारी, आन्तरिक विवाद मुख्यकारण

काठमाडौं । प्रदेश २ मा यतिबेला कोरोना संक्रमण व्यापक बनेको छ । प्रदेश सरकारले यस्तो अवस्थामा प्रभावकारी काम गर्न नसकेको भन्दै चौतर्फी आलोचना खेप्नु परेको छ ।  योसँगै सरकार परिवर्तनको चर्चा पनि चल्न थालेको छ । तर सरकार परिवर्तनको तयारी भने महामारी सुरु हुनु भन्दा अघिको रहेको थाहा भएको छ । 

प्रदेश २ मा मुख्यमन्त्री बनेसँगै लालबाबु राउतले केन्द्र सरकारसँग जोरी खोज्‍न कुनै कसर बाँकी राखेनन् । भारतीय प्रधानमन्त्री नरेन्द्र मोदी जनकपुर आउँदा उनले कुटनीतिक मर्यादालाई कुल्चेर संविधान संशोधन नभएको गुनासो पोखेका थिए । त्यसयता नै उनको केन्द्र सरकारसँग सम्बन्ध राम्रो छैन । बारम्बार उनले दिने अभिव्यक्तिबाट पनि उनको केन्द्रसँगको सम्बन्ध प्रष्ट हुन्छ । 

मुख्यमन्त्री राउतको सम्बन्ध केन्द्रसँग मात्र हैन, आफ्नै पार्टीबाट सो प्रदेशका अर्थमन्त्री बनेका विजय यादवसँग पनि राम्रो छैन । विजय यादव पनि प्रदेश २ मा मुख्यमन्त्री प्रत्यासी थिए । तर राउत मुख्यमन्त्री बनेसँगै दुईबीचको सम्बन्ध सुमधुर हुन सकेन। अझ विशेषगरी विजय यादवले अर्थमन्त्रालयको जिम्मेवारी सम्हालेसँगै दुई बीचको विवाद पार्टीमा भुसको आगो झैं सल्किएको थियो । 

अहिले सोही विवादको कारण प्रदेश २ को सरकार परिवर्तनको संघारमा रहेको जनता समाजवादी पार्टी (जसपा) निकट स्रोतको दावी छ । 

यी दुईले सरकार सञ्चालनको क्रममा व्यवसायिक स्वभाव प्रदर्शन नगरी एक अर्कालाई असफल बनाउन हरसम्भव प्रयास गरेको ती स्रोत बताउँछन् ।

यस्तैगरी सरकार सञ्चालनमा पनि मुख्यमन्त्रीको फितलो प्रदर्शनका कारण पनि सरकार परिवर्तन हुन लागेको जानकारहरु बताइरहेका छन् । विशेषगरी मुख्यमन्त्री राउतमा मन्त्री परिचालनमा कमजोरी, भ्रष्टाचारलाई प्रश्रय, प्राथमिकता तोक्न असफल जस्ता कारणले पनि सरकार परिवर्तनको विकल्प नरहेको चर्चा जसपा वृत्तमा चल्ने गरेको छ । 

सरकार परिवर्तनको कारण भने मुख्यमन्त्री राउत मात्र नभइ अन्य प्रदेश मन्त्री पनि रहेको बुझिएको छ । प्रदेश २ का मन्त्रीहरु अहिले कमाउ धन्दामा लागेको जसपाकै नेताहरुको आरोप छ । अर्थमन्त्री विजय यादवले आफ्ना दाइलाई २१ करोडको ठेक्का दिएको आरोप लागेको छ । यस्तै सामाजिक विकास मन्त्री नवलकिशोर साहले आफ्ना छोरालाई कुस्त पैसा कमाउने ठेक्का दिने लगायतको कमिशनमुखी काम गरेको बताइएको छ । 

यी सबै गुनासो जसपाका अध्यक्षद्वय महन्थ ठाकुर र उपेन्द्र यादवकहाँ पुगिसकेको छ । यो विषयमा पार्टीका वरिष्ठ नेता डा.बाबुराम भट्टराई, राजेन्द्र महतो र कार्यकारिणी समितिका सदस्यहरु महेन्द्र राय यादव, राजकिशोर यादव, अनिलकुमार झा र शरतसिंह भण्डारीहरु समेत जानकार छन् । 

यी कारणहरुले प्रदेश २ सरकार परिवर्तन गर्नको लागि पार्टीले मनसाय बनाइसकेको स्रोतले बताएको छ । सोहीकारण यसका लागि पार्टीका शीर्ष नेताहरु घनिभूत छलफलमा व्यस्त रहेको थाहा भएको छ । 

तत्कालीन राष्ट्रिय जनता पार्टी (राजपा) र समाजवादी पार्टी मिलेर बनेको जसपामा यतिबेला शक्ति सन्तुलनको समेत आवश्यकता रहेको बुझिएको छ । प्रदेश २ मा दुई पार्टीको दुई संसदीय दलको नेतासमेत भएकाले अब एउटै नेता चयन गर्नु पर्ने भएको छ । 

योसँगै सरकार परिवर्तनको समेत बाटो खुल्ने जसपाका एक नेताले बताएका छन् । 

केन्द्रमा एकीकरण भैसकेको यो पार्टीको अन्य तहमा एकीकरण भएसँगै सरकारमा प्रतिनिधित्व गर्ने मन्त्रीहरु समेत परिवर्तन हुने भएको हो । पार्टी एकीकरणपछि भने जसपाको संसदीय दलको नेतामा तत्कालीन राजपाले दावी गरिरहेको छ । तर मुख्यमन्त्री भने पूर्व समाजवादीले नै पाउने आँकलन गरिएको छ ।