सकियो ओली–प्रचण्ड छलफल, दुबै पक्ष केही लचक

आज करिब ४ घण्टा चलेको छलफलले अन्योलमा रहेको नेकपा विवादमा समाधानको सम्भावना बढेको देखिएको छ । 

पछिल्लो नौ दिनदेखि फोन मार्फत् वार्ता समेत हुन छाडेपनि आज भने लामै छलफल चलेको हो । 

पछिल्लो पटक प्रम ओलीले एकतर्फी रुपमा स्थायी समिति बैठक स्थगित गरेसँगै दुई पक्षबीचको विवाद थप बढेको थियो। त्यसपछि प्रम ओलीका सहयोगी विष्णु पौडेल र सुवास नेम्वाङहरुले प्रचण्डसँग वार्ता गरेपनि कुनै टुंगो लाग्न सकेको थिएन । 

तर बुधबार प्रम ओलीले एक टेलिभिजन अन्तर्वार्तामा नेकपाको विवाद केही दिनमा समाधान हुने ठोकुवा गरेका थिए । उनले पाँच दिनभित्र पार्टी विवाद समाधान हुने दावी गरेका थिए । 

योसँगै सुरु भएको छलफललाई नेकपा वृत्तले चासोको साथ हेरिरहेको छ ।