विश्वकपको उपाधि जित्ने सपना बोकेका मेस्सीले भने, ‘यो मेरो अन्तिम विश्वकप हो’

एजेन्सी। अर्जेन्टिनाका स्टार फुटबलर ३५ वर्षीय लियोनल मेस्सीले कतारको राजधानी दोहामा जारी फिफा विश्वकप आफ्नो अन्तिम विश्वकप हुने बताएका छन् ।  मेस्सीले सन् २०२२ को फिफा विश्वकप आफ्नो अन्तिम हुने र डिसेम्बर १८ को फाइनलपछि सन्यास लिने घोषणा समेत गरेका छन् । 

विश्वकप फुटबलमा सबैभन्दा धेरै गोल गर्ने कीर्तिमान मेसी आफ्नै कप्तानीमा विश्वकपको उपाधि जित्ने सपनाको नजिक पुगेका छन् । 

गएराति पहिलो सेमिफाइनल खेलमा अर्जेन्टिनाले क्रोएसियालाई ३–० ले पराजित गर्दै विश्वकपको फाइनल प्रवेश गरेको छ। फाइनल डिसेम्बर १८ मा आइतबार हुनेछ ।

दोस्रो सेमिफाइनल मोरक्को र डिफेन्डिङ च्याम्पियन फ्रान्सबीच हुनेछ । क्रोएसियाविरुद्धको खेलमा मेस्सीले उत्कृष्ट खेल प्रदर्शन गरेका थिए । उनले पेनाल्टीमा गोल गर्नुका साथै अल्भारेजको एक गोलमा असिस्ट पनि गरेका थिए ।

गत वर्ष कोपा अमेरिकाको उपाधि जितेका मेस्सीको यो पाँचौं विश्वकप हो । मेस्सीले यस विश्वकपमा उपाधि जितेर आफ्नो सपना पूरा गर्ने आशा राखेका छन् ।

खेलपछि मेस्सीले भने,  ‘विश्वकपमा फाइनल खेलेर आफ्नो यात्रा समाप्त गर्न पाउँदा निकै खुसी छु । यो वास्तवमा निकै सुखद छ । यो विश्वकपमा जे भयो, त्यो निकै भावनात्मक रह्यो । अर्जेन्टिनाका मानिसहरूले यसको कति आनन्द लिनुभयो भनेर हेर्नु पनि निकै सुखद रह्यो । अर्को विश्वकप आउन अझै लामो बाटो छ । म त्यति लामो समयसम्म गर्न सक्छु जस्तो लाग्दैन । यसरी विश्वकपको यात्रा समाप्त गर्नु शानदार हो । ’