प्रधानमन्त्रीको सचिवालयबाट हटाइए माधव खनाल

काठमाडौं । प्रधानमन्त्री बालेन शाहले आफ्नो सचिवालयको टिममा रहेका माधव खनाललाई जिम्मेवारीबाट हटाएका छन् ।

डेढ महिनाअघिको पासपोर्ट प्रकरण, त्यसपछि उनको भूमिका तथा अन्य वैयक्तिक क्रियाकलाप र भूमिको विश्लेषणपछि प्रधानमन्त्री शाहको टोलीले उनलाई टिमबाट बिदा गर्ने निष्कर्ष निकालेको हो ।

प्रधानमन्त्री तथा मन्त्रिपरिषद कार्यालय स्रोतका अनुसार प्रधानमन्त्रीको सचिवालयमा रहेका खनालमाथि गत १ असारको पासपोर्ट प्रकरणमा गरेको व्यवहार र भूमिकामाथि प्रश्न उठेको थियो । त्यो दिन राहदानी विभागका अधिकारी र अख्तियारका पदाधिकारीसामू उनी निकै चर्को र उग्र रुपमा प्रस्तुत भएका थिए ।

उनलाई टिममा राखिरहँदा प्रधानमन्त्री र समग्र सचिवालयको छविमा असर पर्ने सामूहिक निष्कर्षपछि जिम्मेवारीबाट अलग गरिएको पत्र दिइएको हो ।