डा. तोसिमा कार्कीले मेडिकल काउन्सिलको सदस्यबाट दिइन् राजिनामा

काठमाडौं । यही मंसिर ४ गते सम्पन्न आम निर्वाचनअन्तर्गत प्रतिनिधि सभा सदस्य पदमा निर्वाचित भएपछि डा. तोसिमा कार्कीले नेपाल मेडिकल काउन्सिलको सदस्य पदबाट राजिनामा दिएकी छन् । रवि लामिछाने नेतृत्वको राष्ट्रिय स्वतन्त्र पार्टीबाट ललितपुर क्षेत्र नं ३ बाट प्रतिनिधि सभा सदस्य पदमा निर्वाचित भएकी डा. कार्कीले हिजो आइतबार काउन्सिलमा गएर राजिनामा बुझाएकी हुन् ।

काउन्सिलका रजिष्ट्रार डा.कृष्णप्रसाद अधिकारीले डा. कार्कीले हिजो आइतबार काउन्सिलमा आएर राजिनामा बुझाएको दाबी गरे । 

ललितपुर क्षेत्र नं ३ बाट डा. कार्की नेकपा एमालेका अमृत खड्कालाई  पराजित गर्दै ३१ हजार १३६ मतसहित संसदमा पुगेकी हुन् ।

यसअघि मेडिकल काउन्सिलको सदस्य पदबाट राजिनामा नदिई उम्मेदवार बनेको भन्दै उजुरी परेपछि निर्वाचन आयोगले उनको उम्मेदवारी खारेज गरेको थियो । तर, सर्वोच्च अदालतले तोसिमाको उम्मेदवारी कायम रहने निर्देशन दिएको थियो ।