सुकुम्वासीले शव राख्ने बाकसमाथि मेयर बालेनको फोटो राखेर जलाए 

काठमाडौं । काठमाडौं महानगरपालिकाले बल प्रयोग गरेर बस्ती हटाउन खोजेपछि थापाथलीस्थित बागमती नदी किनारको सुकुम्वासीबस्तीका बासिन्दाहरुले काठमाडौं महानगरपालिकाका मेयर वालेन्द्र साह (बालेन) को राजीनामा माग्दै आन्दोलित भएका छन्। 

उनीहरुले आज सडकमा काठमाडौं महानगरपालिकाका मेयर बालेन्द्र शाह (बालेन)को शव राख्ने बाकस (कफिन)माथि फोटो राखेर पुत्ला जलाएका छन् ।

त्यहाँ आज बिहान ८ बजेदेखि यहाँ आन्दोलन जारी छ । बस्ती प्रवेश गर्ने सडकहरु उनीहरुले बन्द गराएका छन् । सडकभरी टायर र ढुंगा छरिएका छन् ।

काठमाडौंको थापाथलीस्थित सुकुम्बासी बस्ती खाली गर्न महानगरपालिकाले सूचना दिएको तर उक्त सूचनाको बेवास्ता गर्दैै स्थानीय जबर्जस्ती बसिरहेपछि हिजो महानगरको टोली डोजरसहित गएको थियो । 

तर बस्तीमा पुग्दा सुकुम्बासी बस्तीका स्थानीयले घरेलु हतियारकोसमेत प्रयोग गर्दा १८ सुरक्षाकर्मी घाइते भएका थिए । 

बासिन्दाहरुले आफूहरुलाई उचित बसोबासको व्यवस्था नमिलाई हटाउन लागिएको भन्दै उनीहरुले आज बिहान काठमाडौं महानगरपालिकाको कार्यालय अगाडि पनि प्रदर्शन गरेका थिए । त्यहाँबाट पुनः आफ्नै वस्तीमा फर्किएर उनीहरुले प्रदर्शन जारी राखे ।

अहिले उनीहरुले मेयर बालेन विरुद्ध नाराबाजी गरिरहेका छन् । उनीहरुमध्‍ये केही सुकुम्वासी माइतीघर मण्डलामा सडकमै ब्‍यानर राखेर अनसनमा बसेका छन् ।