विमानस्थलबाटै पक्राउ परे पूर्व कप्तान सन्दीप लामिछाने

काठमाडौं । एक जना १७ वर्षीय किशोरीमाथि बलात्कार गरेको आरोप लागेका नेपाली राष्ट्रिय क्रिकेट टोलीका पूर्व कप्तान सन्दीप लामिछाने काठमाडौंस्थित त्रिभुवन विमानस्थलबाट पक्राउ परेका छन् ।

दोहाबाट कतार एयरवेजको जहाज चढेर आज बिहान मात्र काठमाडौं ओर्लिएलगत्तै प्रहरीले उनलाई पक्राउ गरेको हो ।

कालो मास्क, कालो क्याप र सेतो ट्र्याकसुटमा रहेका उनलाई प्रहरीले हत्कडी लगाएको छ । हतकडी लुकाउने प्रयासमा त्यसमाथि रुमाल राखिएको छ । सन्दीपले आफूले आत्मसमर्पण गर्न लागेकाले हतकडी नलगाइदिन र आफ्ना वकिललाई विमानस्थलमै उपस्थित गराइदिन प्रहरीसमक्ष माग गरेका थिए, तर उनका दुवै माग सम्बोधन भएनन् ।

विमानस्थलबाट प्रहरी भ्यानमा राखेर उनलाई प्रहरी वृत्त गौशाला लगिएको छ । उनलाई गौशाला प्रहरीमै राखेर अनुसन्धान अघि बढाइने स्रोले जनाएको छ ।

गत भदौ २१ गते एक १७ वर्षीया नाबालिकाले आफूलाई सन्दीपले ५ भदौमा गौशालाको होटलमा लगेर पटक पटक बलात्कार गरेको आरोपमा उजुरी दर्ता गराएकी थिइन् ।

क्यारेबियन लिग खेल्न नेपाल बाहिर रहेका बेला उनीविरुद्ध गौशाला प्रहरीमा उजुरी परेको थियो । उनी विरुद्ध नेपाल प्रहरीको आग्रहअनुसार अन्तर्राष्ट्रिय प्रहरी संगठन इन्टरपोलले डिफ्युजन नोटिस जारी गरेको थियो ।