कर्णालीमा पहिलो कार्यकालमै दुई दर्जन मन्त्री

काठमाडौँ । कर्णाली प्रदेश सरकारको पहिलो कार्यकालमा नै करिब दुई दर्जन मन्त्री भईसकेका छन् । अहिलेसम्म प्रदेश सरकारमा दुईजना मुख्यमन्त्रीसहित २० जना मन्त्री भइसकेका हुन् । 

तीमध्ये सबैभन्दा बढी माओवादी केन्द्रबाट मन्त्री बन्नेको संख्या धेरै छ । माओवादीले एक  मुख्यमन्त्रीसहित सात जनालाई मन्त्री पदको जिम्मेवारी दिएको हो । 

जसमा माओवादी संसदीय दलका नेता महेन्द्रबहादुर शाही प्रदेशको पहिलो मुख्यमन्त्री बनेका थिए ।  यस्तै विमला केसी, सीताकुमारी नेपाली, नरेश भण्डारी, गोपाल शर्मा, छिरिङ डम्डुल लामा, विन्दमान विष्ट र गणेशप्रसाद सिंह मन्त्री भइसकेका छन् ।

माओवादीले गैरसांसद छिरिङ डम्डुल लामालाई समेत मन्त्री बनाएको छ । उनको ६ महिने कार्यकाल सकिएको छ । त्यसपछि दोस्रो स्थानमा एकीकृत समाजवादी परेको छ । हालसम्म एकीकृत समाजवादीले छ जनालाई मन्त्री बनाएको छ । 

काँग्रेसबाट मुख्यमन्त्री जीवनबहादुर शाहीसहित दिनबन्धु  श्रेष्ठ, यज्ञबहादुर बुढाक्षेत्री र हिमबहादुर शाही मन्त्री बनेका छन् । सामाजिक विकासमन्त्री बुढाक्षेत्री भने दोस्रो पटक मन्त्री भएका हुन् ।  एमालेबाट दल रावल र खड्कबहादुर खत्री मन्त्री भएका छन् । उनीहरु एमाले र माओवादीको संयुक्त सरकार हुँदा मन्त्री बनेका थिए ।

आगामी मंसिर ४ गते दोस्रो कार्यकालका लागि कर्णाली प्रदेशको निर्वाचन हुँदै छ ।