निर्वाचनका लागि दल दर्ता गर्ने समय आज अन्तिम 

काठमाडौँ । आगामी  मंसिर ४ गते  हुने संघीय र प्रदेश सभा निर्वाचनका लागि दल दर्ता गर्ने समय आजबाट सकिदैछ । निर्वाचन आयोगको कार्यतालिका अनुसार निर्वाचन प्रयोजनका लागि दल दर्ता गराउने आज अन्तिम दिन हो । 

सत्तारुढ नेपाली काँग्रेस र नेकपा माओवादी केन्द्रले आज निर्वाचनको लागि दल दर्ता गर्ने बताइएको छ । काँग्रेसको दल दर्ताको जिम्मेवारी पार्टी मुख्यसचिव कृष्णप्रसाद पौडेलले लिएका छन् । त्योसँगै उनले आज आयोगमा गएर निर्वाचनको लागि दल दर्ता गर्ने भएका हुन् ।

तर, यसअघि नै प्रमुख प्रतिपक्ष दल नेकपा एमाले लगायत दलहरुले निर्वाचन प्रयोजनका लागि दल दर्ता गराइसकेका छन् ।  आयोगले आगामी  प्रतिनिधिसभा र प्रदेशसभा सदस्यका लागि गत आइतबारबाट दल दर्ता कार्यक्रम शुरु गरेको थियो । त्यसलगत्तै सबैभन्दा पहिला सिके राउत नेतृत्वको जनमत पार्टीले आयोगमा दल दर्ता गरेको हो ।