काठमाडौं । युवतीको नग्न तस्बिर खिचेर ब्लाकमेल गर्दै बलात्कारको प्रयास गरेको आरोपमा एक नाबालिक सहित २ जना पक्राउ परेका छन् ।
ती युवतीको व्यक्तिगत तस्बिर सार्वजनिक गरिदिने धम्की दिई जबर्जस्ती करणी गर्ने प्रयास गरेको अभियोगमा रुपन्देहीको सालझण्डीबाट प्रहरीले दुबैलाई पक्राउ गरेको हो ।
पक्राउ पर्नेमा रुपन्देहीको गैडहवा गाउँपालिका–९ का २१ वर्षीय जगन्नाथ मल्लाह र एकजना १७ वर्षीय किशोर पक्राउ परेका हुन् ।
युवतीको नग्न तस्बिर खिचेर सोही फोटो भाइरल बनाइदिने धम्की दिँदै जबरजस्ती गर्न खोजेको पीडित युवतीको उजुरीको आधारमा आइतबार सैनामैना नगरपालिका–७ देउवापारबाट उनीहरूलाई पक्राउ गरिएको इलाका प्रहरी कार्यालय सालझण्डीले जनाएको छ ।
किशोरले नक्कली फेसबुक आईडी बनाई विगत २ सातादेखि म्यासेज पठाई निजी तस्बिर सार्वजनिक गर्छु भन्दै ब्ल्याकमेल गरेको प्रहरीले जनाएको छ ।
शनिबार साँझ भेट्न बोलाई उनले युवतीलाई जबरजस्ती गर्ने प्रयास गरेका थिए । ती किशोरको साथबाट युवतीको तस्बिर भएको मोबाइलसमेत बरामद गरिएको प्रहरीले जनाएको छ ।
उनीहरूविरुद्ध जबर्जस्ती करणीसम्बन्धी कसुरमा म्याद थप भई थप अनुसन्धान भइरहेको प्रहरी निरीक्षक जगन्नाथ मरासिनीले बताए ।
