गोकुल बास्कोटाले घरजग्गा कारोबारीलाई टिकट दिएपछि बनेपाका मेयर लक्ष्मीनरसिंह बादेले एमाले छाडे

बनेपा । बनेपा नगरपालिकाका मेयर लक्ष्मीनरसिंह बादेले एमाले पार्टी परित्याग गरेका छन् । एमाले नेता तथा ७० करोड रुपैयाँ घुसको अडियो सार्वजनिक भएपछि राजीनामा दिएका पूर्व संचार मन्त्री गोकुलप्रसाद बाँस्कोटाले बनेपाका मेयर र उपमेयरमा नयाँ उम्मेदवारलाई अगाडि सारेपछि बादे रुष्ट भएका थिए । बादेले शनिबार राजीनामा घोषणा गरेका छन् ।

बास्कोटाले बनेपाको मेयरमा रत्नकुश रंजितकारलाई र उपमेयरमा हरिशरण दाहालकी श्रीमती बिमला सापकोटालाई उम्मेदवार बनाएको छ । हरिशरण समाजवादीतिर ढल्किएपछि बास्कोटाले एमालेमा ल्याए । काभ्रे बार एशोसिसनको अध्यक्षमा उम्मेदवार बनाएको भए पनि पराजीत भएपछि उनकी श्रीमतीलाई उपमेयरको टिकट दिइएको छ ।

घरजग्गा कारोबारी रंजितकारलाई टपक्क टिपेर मेयरमा उम्मेदवार बनाइएको भन्दै एमालेमा असन्तुष्टि छ । त्यही असन्तुष्टिकै शृंखलाका रुपमा मेयर बादेको एमाले त्याग भएको बताइन्छ ।  बादेले एमाले छाडे पनि कुनै पार्टीमा प्रवेश भने गरेका छैनन् । २०७४ को स्थानीय तहको निर्वाचनमा वादेले कांग्रेसका उम्मेदवार राम जोशीलाई १७ सय २१ मतले पराजित गरेर विजयी बनेका थिए ।

उपमेयरमा पनि एमालेकी रेखा दाहाल सापकोटाले कांग्रसकी उम्मेदवार र्निमला श्रेष्ठलाई १ हजार ४२ मतले पराजित गरेकी थिइन् । 
हालकी उपमेयर रेखा दाहाललाई पनि एमालेले यसपटक नदोहोर्याएपछि एमालेका लागि बनेपा नगरपालिकाको चुनाव जित्न कठिन देखिएको छ । बनेपा नगरपालिकामा नेपाली कांग्रेस र समाजवादीबीच तालमेल भएको छ । मेयरमा नेपाली कांग्रेसबाट शान्तिरत्न शाक्य र उपमेयरमा नेकपा समाजवादीका रघुवर चौ प्रधान उम्मेदवार छन् । मेयर बादेको एमाले त्यागले समाजवादीलाई लाभ पुग्ने आँकलन गरिएको छ ।  

बनेपाको मेयर पदबाट राजीनामा पनि गरेका छन्  ।