भरतपुर, ४ चैत । चितवनमा रगतको अभाव भएको छ । कोरोनाको त्रासले रक्तदान कम हुँदा चितवनमा रगतको अभाव भएको हो ।
चीनबाट भाइरलको रुपमा फैलिएको कोरोनाको कारण संघसंस्थाहरुले रक्तदान कार्यक्रम सञ्चालन गर्न पाएका छैनन् । संघसंस्थाले सञ्चालन गर्ने रक्तदान कार्यक्रम रोकिएसँर्गै जिल्लामा रगतको अभाव भएको सरोकारवाला निकायल बताएको छ ।
नियमित रक्तदान गर्ने संघसंस्थाले पनि यो समयमा रक्तदान कार्यक्रम आयोजना गरेका छैनन् । गर्मी बढ्दै जाँदा जिल्लामा रगतको समेत अभाव हुने गर्छ । जिल्लामा दैनिक एक सय ५० युनिट रगतको माग छ । तर, अहिले ५० युनिट मात्र संकलन भएको क्षेत्रीय रक्तसञ्चार केन्द्र भरतपुरका प्रमुख रमेशकान्त पौडेलले बताएका छन् ।
'हाल जिल्लामा एक सय यूनिट रगत कम भएको क्षेत्रीय रक्तसञ्चार केन्द्र भरतपुरका प्रमुख पौडेलले बताए ।' उनले भने 'अहिले २५ प्रतिशत मात्रै रगतको व्यवस्थापन भएको छ । चितवनमा ११ जिल्लाका मानिसहरू उपचारका लागि आउने भए पनि रक्तदान गर्नुपर्ने भार भने बढी चितवनमा मात्रै परेको छ । अहिले रगतका लागि बिरामीका आफन्तले मान्छे खोजेर ल्याउनुपर्ने वाध्यता आइलागेको छ ।'
रगतको व्यवस्थापन गर्न स्वयंसेवी रक्तदाता र विभिन्न संघसंस्थालाई आग्रह गरिएको पौडेलले बताएका छन् ।
मेडिकल सिटीको रुपमा विकास भइरहेको भरतपुरमा बिरामीहरूको अत्याधिक चाप रहेको छ । चितवनमा दुई ठूला मेडिकल कलेज, क्यान्सर अस्पताल, भरतपुर केन्द्रीय अस्पताल र दुई दर्जन भन्दा बढी निजी हस्पिटलहरू रहेका छन् ।' विशेषगरी क्यान्सरका बिरामीलाई बढी रगतको आवश्यक पर्दछ' भने, चितवनमा सवारी दुर्घटना पनि बढी हुने भएकाले रगतको माग बढी भएको हो।'
