चितवन । रुकुम पश्चिममा हावाहुरीले विद्यालयको छाना उडाउँदा शिक्षकसहित विद्यार्थीहरु घाइते भएका छन्।
बिहीबार बेलुका आएको हावाहुरीले जिल्लाको आठबिसकोट नगरपालिका वडा नम्बर ९ को बालकल्याण माध्यमिक विद्यालयको छाना उडाउँदा शिक्षक/विद्यार्थीसहित पाँच जना घाइते भएका हुन् ।
जनविकास माध्यमिक विद्यालय आठबिसकोटका प्रधानाध्यापक दीपक सङ्गम थापाका अनुसार विद्यार्थी रामबहादुर मल्ल, जनकल्याण माध्यमिक विद्यालय गोइरीका शिक्षिका अमृता रसाइली र छात्रा कविता विक, आदर्श माध्यमिक विद्यालयका क्यान्टिन सञ्चालक राजेन्द्र मल्ल र स्थानीय सुशीला बस्नेत घाइते भएका छन् ।
घाइतेको टाउको, अनुहार तथा शरीरका अन्य भागमा चोट लागेको छ । घाइते सबैजनाको आठबिसकोट नगर अस्पतालमा उपचार भइरहेको छ । उनीहरुको अवस्था सामान्य रहेको थापाको भनाइ छ।
