काठमाडौं । यता प्रतिनिधिसभा बैठकमा अमेरिकी सहयोग परियोजना मिलेनियम च्यालेन्ज कर्पाेरेसन (एमसीसी) सम्झौतामाथि सैद्धान्तिक छलफल सुरु भएको बेला नयाँ बानेश्वर क्षेत्रमा प्रदर्शनकारी र प्रहरीबीच झडप भएको छ ।
आइतबार काठमाडौंको नयाँ बानेश्वर क्षेत्रमा प्रदर्शनकारीमाथि प्रहरीले पानीको फोहरा र अश्रुग्यास प्रहार गरेसँगै उनीहरुबीच झडप भएको हो । झडपपछि अहिले उक्त क्षेत्रको स्थिति तनावग्रस्त बनेको छ ।
एमसीसीविरुद्धको नारा लगाइरहेका उनीहरु संसद भवन अगाडिको निषेधित क्षेत्र क्रस गर्न खोजेपछि प्रहरीले उनीहरुलाई रोकेको थियो । तर, प्रदर्शनकारीले प्रहरीमाथि ढुंगामुढा गरिरहेका छन् ।
प्रदर्शनका क्रममा उनीहरुले घरेलु हतियार समेत बोकेर विरोधमा उत्रिएका छन् । उनीहरुको साथमा खुर्पा, भाटा, लट्ठीहरु रहेका छन्। अहिले उक्त क्षेत्रमा उच्च सतर्कता अपनाइएको छ।
