कांग्रेस सिन्धुपाल्चोकको जिल्ला अधिवेशन फागुन २६ र २७ गते हुने

सिन्धुपाल्चोक । नेपाली कांग्रेसको १४औं जिल्ला अधिवेशन आगामी फागुन २६ र २७ गते हुने भएको छ । शनिबार केन्द्रीय सदस्य मोहनबहादुर बस्नेतको सम्पर्क कार्यालयमा बसेको बैठकले फागुन २६ गते मनोनयन दर्ता गरी भोलिपल्ट निर्वाचन गर्ने निर्णय गरेको हो ।

मनोनयन दर्ता गरेकै दिन अन्तिम नामावली प्रकाशन गरिनेछ । जिल्ला सहसचिव अनुप न्यौपानेका अनुसार यसअघि पटक-पटक सर्दै आएको अधिवेशन फागुन अन्तिम साता गरिने निर्णय गरिएको हो । कांग्रेस सिन्धुपाल्चोकका शीर्षनेताहरूको बैठकबाट सो निर्णय गरिएको उनले जानकारी दिए ।

कांग्रेस सिन्धुपाल्चोकको सभापतिमा डा.प्रेमध्वज लामा र बंशलाल तामाङले सभापतिमा उम्मेदवारी दिने भएका छन् । प्रेमध्वज लामाले त्रिभुवन विश्वविद्यालयको उपप्राध्यापकबाट राजीनामा दिएर जिल्ला सभापतिमा उम्मेदवार हुने निर्णय गरेका हुन् । कांग्रेसका केन्द्रीय सदस्य मोहनबहादुर बस्नेतले पनि प्रेमध्वजलाई नै समर्थन गर्ने भएकाले उनको जितको संभावना प्रबल रहेको छ ।