काठमाडौं । राष्ट्रिय परीक्षा बोर्डले यस वर्षको माध्यमिक शिक्षा परीक्षा (एसईई) को सबै अधिकार प्रदेशलाई हस्तान्तरण गर्ने प्रस्ताव अगाडि सारेको छ । बिहीबार शिक्षा पत्रकार समूह (इजोन) ले आयोजना गरेको कक्षा ११ र १२ तथा एसईई परीक्षा सम्बन्धी अन्तरक्रिया कार्यक्रममा राष्ट्रिय परीक्षा बोर्डका अध्यक्ष डा. महाश्रम शर्माले सो कुरा बताएका हुन् ।
इजोनले आज दरवार हाईस्कूल रानीपोखरीमा आयोजाना गरेको अन्तरक्रिया कार्यक्रममा बोल्दै राष्ट्रिय परीक्षा बोर्डका अध्यक्ष डा. शर्माले आगामी बैशाखमा हुने एसईई परीक्षमा करिब ११ हजार बिद्यालयका करिब ५ लाख बिद्यार्थी सहभागी हुने बताए ।
त्यसैगरी शर्माले बिद्यार्थीहरुको सहजताका लागि २ हजार परीक्षा केन्द्र्र ब्यवस्था गरिएको बताएका छन् । उनले भौतिक उपस्थितिमा नै परीक्षा सञ्चालन गर्ने बताउँदै त्यो बेला कोरोना सङ्क्रमण बढेमा त्यही अनुसार नयाँ विधि प्रयोग गर्न सकिने बताएका छन् ।
सरकारले घोषणा गरेको स्थानीय निर्वाचनलाई ध्यानमा राखेर बोर्डले एसईई परीक्षा बैशाख ९ गतेदेखि नै गर्ने निर्णय गरेको उनले बताएका छन् ।
बोर्डका अध्यक्ष शर्माले कक्षा १२ को परीक्षा तालिका केही दिनमा सार्वजनिक गरिने जानकारी दिए ।
