प्रधानमन्त्रीले बोलाए सर्वदलीय बैठक

काठमाडौं । प्रधानमन्त्री शेरबहादुर देउवाले भोली दिउँसो सर्वदलीय बैठक बोलाएका छन् ।

प्रधानमन्त्री देउवाको सचिवालयका अनुसार बैठक आइतबार दिउँसो ४ बजेका लागि बोलाइएको हो ।

बैठकमा प्रतिनिधिसभामा प्रतिनिधित्व गर्ने राजनीतिक दलका शीर्ष नेता र पूर्वप्रधानमन्त्रीहरुलाई बोलाइएको उनको सचिवालयले जनाएको छ ।

स्रोतका अनुसार प्रधानमन्त्री देउवाले अवरोधरहित ढङ्गले संसद्को जारी अधिवेशन सञ्चालन गर्ने लगायतका विषयमा बैठक बोलाएका हुन् ।

यस्तै, बैठकमा सडक, ऊर्जालगायत मुलुकको भौतिक पूर्वाधार विकासमा अनुदानस्वरुप अमेरिकाबाट प्राप्त हुने रु ५५ अर्बभन्दा बढीको एमसिसी सहयोगलाई संसदीय अनुमोदनको प्रक्रियामा लैजाने, भुक्तानी सन्तुलन नकारात्मक हुँदा अर्थतन्त्रमा परेको चाप कम गर्न अपनाउनुपर्ने उपायजस्ता विषयमा छलफल हुने बताइएको छ ।