मन्त्रिपरिषदको बैठक सम्पन्नः पसल ब्यवसाय खुल्ने, सवारी साधन जोरबिजोरका आधारमा संचालन हुने

काठमार्डाैं, २८ जेठ । करिब ३ महिनाको लकडाउनका कारण जनजीवन कष्टकर बनेको र ब्यवसाय संचालन गर्न नपाएका कारण नागरिक सडकमा उत्रिएपछि सरकारले पसल र व्यवसाय सञ्चालन गर्न दिने निर्णय गरेको छ । बुधबार बेलुका बसेको मन्त्रिपरिषद् बैठकले सबै किसिमका पसलहरु सुरक्षा मापदण्ड अपनाएर सञ्चालन गर्न दिने निर्णय गरेको हो ।

यसैगरी निजी सवारीसाधन जोरबिजोरका आधारमा सञ्चालन गर्न दिने निर्णय पनि भएको छ । यो निर्णय भोलि बिहीबारदेखि नै लागू हुने एक मन्त्रीले जानकारी दिएका छन् ।

त्यसैगरी सरकारले सशस्त्र प्रहरीका ३ एआइवीको सरुवा पनि गरेको छ । एकेडेमीका एआइजी पुष्पराम केसीलाई मानवस्रोत विभाग, कार्यविभागका नारायणबाबु थापा एकेडेमी र मानवस्रोतका एआइजी रामशरण पौडेलको कार्यविभागमा सरुवा भएको छ । सशस्त्र प्रहरी बलका एआइजीहरुको सरुवा केही समयअघि गर्न खोजिए पनि आइजीपी शैलेन्द्र खनालले १ बर्ष नपुगी गर्न मानेका थिएनन् । उनले नमानेपछि गृहमन्त्रालयका सचिव महेश्वर न्यौपानेले प्रस्ताव नल्याए गृहले नै गर्ने चेतावनी दिएपछि उनी गलेका थिए ।