सीमा विवादमा यी शीर्षनेता किन मौन ?

काठमाडौं । नेपालको भूभाग लिम्पियाधुरा, लिपुलेक र कालापानी अतिक्रमण गरी भारतले मानसरोबर जाने सडक उद्घाटन गरेको जेठ २६ मा १ महिना पुग्दैछ । यो एक महिनाका बीचमा सीमा विवादमा धेरै बहस र छलफल भए । सीमा जस्तो संवेदनशील बिषयलाई सरकारले गम्भीर रुपमा लिएर नेपालको भूभाग लिम्पियाधुरा, लिपुलेक र कालापानी समेटेर नक्सा जारी गरेको छ । सरकारले नक्सा जारी गरेको बिषयलाई प्रमुख प्रतिपक्षी नेपाली कांगे्रेसका सभापति शेरबहादुर देउवादेखि डा. मिनेन्द्र रिजाल, गगन थापाहरुले समेत हार्दिक समर्थन गरेका छन् ।

देशको सीमा मिचिएको बिषयमा नेकपाका कार्यकारी अध्यक्ष पुष्पकमल दाहाल ‘प्रचण्ड’ले अहिलेसम्म एक शब्द पनि बोलेका छैनन् । उनको मौनतालाई भने नेकपाभित्रै रहस्यका रुपमा हेरिएको छ । प्रचण्डले भूमिब्यवस्था, सहकारी तथा गरिबी निवारण मन्त्री पदमा अर्यालबाट नयाँ नक्सा लिएबाहेक सीमा विवादमा एक शब्द पनि बोल्न आवश्यक ठानेका छैनन् । सीमा मिचिंदा पनि उनको मौनतालाई राजनीतिक बृत्तमा अर्थपूर्ण ठानिएको छ । नेकपाभित्र अध्यक्ष तथा सरकार प्रमुख प्रधानमन्त्री केपी शर्मा ओलीलाई हटाउने एकसूत्रीय एजेन्डामा लागेका प्रचण्ड उनले नयाँ नक्सा जारी गरेपछि मौन छन् । कोरोना महामारीका बीचमा सार्वजनिक नभए पनि मिडियामार्फत् हरेक सानातिना राजनीतिक घटनाक्रममा बोल्ने उनी सीमा विवादमा चुप छन् । जबकि भारतीय नेता र नेपाल मामिलाका विज्ञ बताउने एसडी मुनिहरुले जनयुद्धताका माओवादी नेताहरुलाई शरण दिएर भारतले ठूलो गल्ती गरेको भन्दै एकोहोरो रटान लगाइरहेका छन् ।

नेकपाको नेतृत्वको सरकारले नक्सा जारी गरेपछि भारतीयहरुले माओवादी जनयुद्ध भारतकै सहयोगमा सफल भएको, नेपालमा गणतन्त्र ल्याएको जस्ता अनर्गल प्रलाप गरिरहेका छन् । नेपाल सरकारले नक्सा जारी गरेपछि भारतीय मिडियाले प्रचण्डका बिरुद्ध बिषबमन गर्दा पनि उनी सीमा विवादमा चुप छन् । सरकारले जारी गरेको नयाँ नक्साका बारेमा न उनले खुलेर समर्थन नै गरेका छन्, न त बिरोध नै गर्ने अवस्थामा छन् । त्यसो त उनीमात्रै होइन, पूर्वमाओवादी बृत्तका बरिष्ठ नेताहरुले नयाँ नक्साको बारेमा एक शब्द पनि बोलेका छैनन् । बरु पूर्वमाओवादी केन्द्र निकट मिडियाहरुले नक्सा जारी गर्ने र संविधान संशोधन गर्ने कुरालाई घुमाउरो भाषामा बिरोध अभियान सुरु गरेका छन् । नेकपासँग मधेश टाढिएको जस्ता समाचारलाई महत्वका साथ स्थान दिन थालिएको छ ।

सीमा जस्तो बिषयमा प्रचण्ड नबोल्नुलाई रहस्यपूर्ण मानिएको छ । सीमा विवादमा प्रचण्डको मौनतालाई अनेक अर्थमा परिभाषित गर्न गर्ने क्रम सुरु भएको छ । भारतलाई चिढ्याएर होइन, खुसी पार्दा नै राजनीतिक लाभ देखेकाले उनी मौन बसेका त होइनन् ? यो प्रश्न नेकपाका कार्यकर्ता पंक्तिमा उठेको छ ।

त्यस्तै सीमा विवादमा एक शब्द पनि नबोल्ने शीर्षनेतामा नेपाली कांग्रेसका रामचन्द्र पौडेल पनि हुन् । उनी पनि सीमा विवादमा सार्वजनिक रुपमा बोलेको कतै पनि सुनिएको छैन । कोरोना भाइरस संक्रमण फैलिने क्रममा पौडेलले रााष्ट्रिय सरकार बनाउनुपर्ने अभिब्यक्ति दिएर विवादमा परेका थिए । तर सीमा जस्तो गहन र राष्ट्रियतासँग जोडिएको बिषयमा उनी मौन छन् । १७ पटक प्रयास गर्दा पनि प्रधानमन्त्री हुन नसकेका पौडेल सीमा विवादमा मौन बसेर पुनः प्रधानमन्त्री वा पार्टी सभापतिको आशामा बसेका त होइनन् भन्ने चर्चा पनि राजनीतिक बृत्तमा हुने गरेको छ ।