ओली भन्छन्: भीम रावलले किन वडा अधिवेशन भएको छैन भन्नुभयो, म सोध्छु

काठमाडाैं । नेकपा एमालेका उपाध्यक्ष भीम रावलले सुदूरपश्चिमका कुनै पनि जिल्लामा वडा अधिवेशन भएको जानकारी नआएको बताएपछि अध्यक्ष केपी शर्मा ओलीले त्यसबारे प्रतिक्रिया दिएका छन् । 

सुदूरपश्चिममा वडा अधिवेशन नै नभएको भन्ने रावलको भनाइबारे आज मोरङमा आयोजित पत्रकार सम्मेलनमा अध्यक्ष ओलीले अधिवेशन भएको बताएका हुन् ।

‘उहाँ (भीम रावल) ले किन त्यस्तो भन्नुभयो, म काठमाडौं गएर सोध्छु,’ ओलीले भने ।

एमालेले कात्तिक ६ गते वडा अधिवेशन राखेको थियो ।

छ हजारभन्दा बढी वडामा अधिवेशन सकिएको एमाले कार्यालय सचिव शेरबहादुर तामाङले बताए पनि रावलले भने सुदूरपश्चिममा वडा अधिवेशन भएको जानकारी नआएको बताएका थिए ।