मोतिपुर घटनाको मुख्य कारण ओली नेतृत्वको सरकार भएको सत्तारुढ तीन दलका विद्यार्थी संगठनको आरोप

काठमाडौं । सत्तारुढ तीन दलका विद्यार्थी संगठनहरुले रुपन्देहीको मोतीपुरमा प्रहरीको गोलीबाट चार जनाको मृत्यु भएकोमा सरकारको आलोचना गर्दै दोषीलाई कारबाहीको माग गरेका छन् ।

मंगलबार नेकपा माओवादी केन्द्रनिकट अनेरास्ववियू क्रान्तिकारीकी अध्यक्ष पञ्चा सिंह, नेकपा एकीकृत समाजवादी निकट अनेरास्ववियु अध्यक्ष सुदेश पराजुली र जनता समाजवादी पार्टी (जसपा) निकटका अध्यक्ष रुपनारायण श्रेष्ठले संयुक्त विज्ञप्ति जारी गर्दै घटनाको छानविन गरी दोषीलाई कारबाहीको माग गरेका हुन् ।

विज्ञप्तिमा घटनाको मुख्य कारण भने तत्कालीन केपी शर्मा ओली नेतृत्वको सरकार भएको आरोप लगाइएको छ।

यस्तै, उनीहरुले घटनाको छानबिन गरी दोषीलाई कारबाही गर्न, मृतकका परिवारलाई उचित क्षतिपूर्ति दिन र घाइतेहरुको निःशुल्क उपचार गर्न समेत सरकारको ध्यानाकर्षण गराएका छन् ।

तत्कालीन सरकारले राज्य शक्तिको चरम दुरूपयोग गरी मोतीपुर क्षेत्रमा बसोबास गरिरहेका सर्वसाधारण जनतालाई सत्ता र शक्तिको आडमा लखेट्ने दुस्साहसको परिणाम आज मोतीपुर क्षेत्र रणमैदान भएको छ,’ विज्ञप्तिमा लेखिएको छ ‘अनाहकमा जनताको ज्यान गएको यो घटनाको मुख्य कारण तत्कालीन प्रतिगामी सरकार र त्यसका अर्थमन्त्री भएको हाम्रो निश्कर्ष छ।’