१० वर्षपछि राजकुमार लेखी एमालेमै फिर्ता

काठमाडाैं । चार दिनअघि लोकतान्त्रिक समाजवादी पार्टीबाट राजीनामा दिएका राजकुमार लेखी नेकपा एमाले प्रवेश गरेका छन् । 

नेपाल आदिवासी जनजाति महासंघका पूर्वअध्यक्ष तथा थारु कल्याणकारिणीसभाका पूर्वमहामन्त्री राजकुमार लेखी १० वर्षपछि एमालेमै फर्कीएका हुन् ।

एमाले स्राेतका अनुसार गोदावरीमा जारी विधान महाधिवेशनको अन्तिम दिन लेखीसहित ५५ जना केपी शर्मा ओली नेतृत्वको नेकपा एमालेमा प्रवेश गरेका छन् ।

लेखीले असोज १४ गते लोकतान्त्रिक समाजवादी पार्टीबाट राजीनामा दिएका थिए । 

उनीले २०४० सालदेखि एमालेको विद्यार्थी संगठनमा काम गर्दै २०४६ सालपछि नेकपा एमालेबाट सक्रिय राजनीतिमा प्रवेश गरेका थिए । 

पहिलो संविधानसभा विघटन भएपछि एमाले छाडेका उनले आफ्नै नेतृत्वमा नेपाल नागरिक पार्टी  गठन गरेका थिए । त्यसपछि सो पार्टीलाई राजेन्द्र महतोको सद्‍भावना पार्टीसँग एकता गरे । त्यसयता मधेस केन्द्रित दलमा रहे । पछिल्लो पटक जनता समाजवादी पार्टी विभाजित हुँदा उनी महन्थ ठाकुर पक्षमा लागेका थिए ।

एमालेमा रहँदा उनले काठमाडौं-सप्तरी सम्पर्क मञ्चको अध्यक्ष, एमाले सगरमाथा अञ्चल सम्पर्क कमिटीको सचिव, युवा संघ नेपालको केन्द्रीय सदस्य, युवा संघ नेपालको केन्द्रीय प्रचार विभाग सदस्य, नेकपा एमाले केन्द्रीय समितिको संघीय मामिला विभाग र सम्पर्क वभाग सदस्य, एमाले लोकतान्त्रिक आदिवासी जनजाति महासंघको केन्द्रीय सचिवालय सदस्यको रुपमा काम गरेका थिए ।