दैलेख । दैलेखकाे गुराँस गाउँपालिका–८ मा रहेको मालिका माध्यमिक विद्यालयका शिक्षक नगेन्द्र बिसीको घाँटी रेटेर हत्या गरेकाे अभियोगमा प्रहरीले एक महिलालाई पक्राउ गरेको छ ।
बिसीको हत्या अभियोगमा विद्यालय नजिकैकी २५ वर्षीया मुना रानालाई प्रहरीले बुधबार पक्राउ गरेको हो ।
पक्राउ परेकी महिलाले व्यक्तिगत रिसिबीका कारण राति साढे १ बजे धारिलो हतियार प्रहार गरेर हत्या गरेको स्वीकार गरेको प्रहरीले बताएकाे छ ।
बिसीको शव मालिका माध्यमिक विद्यालयको विज्ञान प्रयोगशाला अगाडि बरण्डामा मृत भेटिएकाे थियाे । उनी सोही विद्यालयका राहत शिक्षक हुन् ।
घटनास्थलभन्दा करिव ३० मिटर पश्चिममा ती महिलाको घर छ । घटनास्थल लाश जाँच मुचुल्का, घटनास्थलमा भेटिएका सबुत प्रमाण संकलन र खानतलासीबाट बरामद भएका प्रमाणले पनि उनले नै हत्या गरेको पुष्टि भएको प्रहरीले बताएको छ ।
पीडित पक्षबाट जाहेरी लिएर उनीविरुद्ध अनुसन्धान अगाडि बढाएको दैलेखका प्रहरी प्रमुख अनुपराज श्रेष्ठले बताए ।
