घनश्याम भुसाल भन्छन्: एमाले विभाजनले ठूलो चोट लागेकाे छ, अब मात्तिनु हुँदैन

काठमाडाैं । नेकपा एमालेका उपमहासचिव घनश्याम भुसालले एमाले विभाजनले ठूलो चोट लागेकाले अब पार्टीले संयम भएर अघि बढ्नु पर्ने बताएका छन् ।

रुपन्देहीको बुटवलमा आज (बुधबार) आयोजित कार्यकर्ता भेलालाई सम्बोधन गर्दै उनले साे कुरा बताएका हुन् ।

‘हामी धेरै ठूलो चोटीबाट पछारिएका हौं, त्यसैले हामीले मात्तिनु हुँदैन, उनले भने, हामी राष्ट्र र विकासको कुरा गर्छौ सबै कुरा हटाई दिने हो भने राष्ट्र अमूर्त हुन्छ । हामीले देश विकासका लागि भोट लिएको हो । हामीले बाटो बिराउनु हुँदैन । हामीले विचार पुर्‍याएर अघि बढ्नु पर्छ ।’

उनले आफूहरुले समृद्ध मुलुक चाहेको पनि बताएका छन् । ‘हामी समृद्ध हुन चाहन्छौं । एमाले पथभ्रष्ट भयो भने यो मुलुकको भविष्य के हुन्छ ?’, उनले सोधे, ‘अब हामीले एकतावद्ध भएर अघि बढ्ने हो भने २०७४ सालको बर्चश्व फर्काउन सक्छौं ।’ ‘एमालेले सामाजिक र सांस्कृतिक रुपले नेपाली समाजमा जरा गाडिसकेको छ । त्यो पार्टीको अभाव अर्को कसैले पूरा गर्न सक्दैन’, भुसालले भने, ‘एमालेको निर्माणमा हामीले ठूलो मिहिनेत गरेका छौं । यही कुरा हामीले माधवकुमार नेपाललाई बताउन सकेनौं । उहाँ आफैंले बुझे जस्तो गर्नु भएन किन बुझ्नु भएन ।’

भुसालले यसअघि नेकपामा देखिएको विवादतिर इंगित गर्दै यसबीचमा भएका गल्तीको पनि समीक्षा हुनुपर्नेमा जोड दिएका छन् ।

‘यो बीचमा कस–कसले गल्ती गरे ? गरेनन् हामीले समीक्षा गरौं’, उनले भने, ‘हामी यो बीचमा भाँडिएका हौं । अब फेरि हामी भाँडिनु भएन । हामी घाइते भएका छौं, ठन्डा दिमागले सोचेर पार्टीलाई एकै ठाउँमा ल्याऊँ ।’

उनले अब आफूहरुले एमालेलाई बलियो बनाउन कसम खाएको पनि बताए । ‘हामीले कसम खाएका हौं । कसले गल्ती ग¥यो गरेन, सबै छुट्टिन्छ। ’