जुम्ला, ११ जेठ । कोरोना रोकथाम तथा नियन्त्रण गर्नको लागि जारी गरेको लकडाउन उल्लङ्घन गर्ने र सवारी पास दुरुपयोग गर्नेलाई प्रहरीले नियन्त्रणमा लिई कारबाही गरेको छ । उनीहरुलाई जुम्लाबाट नियन्त्रणमा लिएको हो ।
प्रमुख जिल्ला अधिकारी दुर्गा बञ्जाडेका अनुसार गत चैत १० देखि जेठ १० गतेसम्म ६७१ सवारीसाधनलाई प्रहरीले नियन्त्रण लिई कारवाही गरेको हो ।कारबाहीमा पर्नेमा ९६ चारपांग्रे ठूला सवारी साधन र ५ सय ७५ दुईपाङ्ग्रे मोटरसाइकल छन् ।
निश्चित प्रयोजन र समयावधिका लागि भनी तोकिएको पासलाई अवधि समाप्त भएपछि वितरित पासको प्रयोग गरी दुरुपयोग गरेको पाइएकाले सवारी साधन नियन्त्रणमा लिएर कारवाही गरेको प्रशासनले जनाएको छ । कोरोना भाइरस सङ्क्रमण फैलिन नदिन तथा रोकथामका लागि लकडाउन गरिएकाले पालना गर्न गराउन थप कडाइ गरिएको प्रहरी नायब उपरीक्षक लालबहादुर धामीले बताए ।
