कांग्रेस जिल्ला सभापतिहरूद्वारा केन्द्रीय कार्यालय सानेपामा धर्ना, यस्ता छन् माग

काठमाडाैं । नेपाली कांग्रेसका जिल्ला सभापतिहरूले मंगलबार बिहान केन्द्रीय कार्यालय सानेपामा धर्ना दिएका छन् ।

क्रियाशील सदस्यताको नामावली पार्टीको वेवसाइटमा सार्वजनिक गरिनुपर्ने लगायत माग गरेर धर्ना गरिएको नुवाकोट कांग्रेस सभापति जगदीश्वरनरसिंह केसीले जानकारी दिए ।

आज दुई घन्टा धर्ना दिने र माग पूरा नभए भोलिदेखि धर्ना जारी राख्ने उनले बताए ।

वडा, जिल्लाबाट आएका क्रियाशीलको नामावली काटेर केन्द्रबाट सिधै क्रियाशीलको नाम राखिएको आशंका उनीहरूको छ ।

साथै उनीहरूले महाधिवेशन प्रतिनिधि नै जिल्ला सभापति उठ्न पाउने विधानको व्यवस्था लागू गरिनुपर्ने बताएका छन् । एक निर्वाचन क्षेत्र भएको ठाउँमा क्षेत्रीय प्रतिनिधि पनि जिल्ला सभापति उठ्न पाउने व्यवस्था नेतृत्वले गरेकोमा जिल्ला सभापतिहरूले आपत्ति जनाएका हुन् ।

आफूहरूले विधानअनुसारका माग राखेकोले सजिलै पूरा गर्न सकिने पनि उनले बताए । ‘नक्कली काम भएको छैन भने वेवसाइटमा क्रियाशीलको विवरण राख्न किन डराएको?,’ उनले भने, ‘क्रियाशील सदस्य सार्वजनिक नगरिनुमा मनपरी भएको छ भन्ने देखाउँछ।’