एमालेका मध्यमार्गी नेतालाई सांसद देवकोटाको प्रश्नः प्रतिनिधिसभा पुनस्थापना दुर्भाग्य कि ऐतिहासिक ?  

काठमाडौं । राष्ट्रियसभाका सांसद खिमलाल देवकोटाले मध्यमार्गी धारको रुपमा चिनिएका र सोमबार  एमालेमा बिलीन भएका ५७ नेताहरुसँग गम्भीर नैतिक प्रश्न तेस्र्याएका छन् ।

देवकोटाको प्रश्न छ– मध्यमार्गी धारका नेताहरुले प्रतिनिधिसभा पुनस्र्थापनालाई अब कसरी लिने हुन् । केपी शर्मा ओलीले नेतृत्व गरेको एमालेले प्रतिनिधिसभा पुनस्र्थापनालाई दुर्भाग्यपूर्ण भनेको अवस्था छ । प्रतिनिधिसभा पुनस्र्थापनालाई दुर्भाग्यपूर्ण भन्ने ओली र महान र ऐतिहासिक भन्ने घनश्याम भूसाल, भीम रावल, सुरेन्द्र पाण्डेलगायत मध्यमार्गीहरु कसरी सँगै जान सक्छन् ?

देवकोटाले तेस्रो धारका नेताहरुलाई अर्को अहम् सवाल पनि उठाएका छन्–‘ओलीले सामूहिक नेतृत्वबाट एकल नेतृत्वमा जाने निरंकुश निर्णय गरिसकेको अवस्थामा मध्यमार्गी धारका नेताहरु उनका वरिपरि घुम्ने र राममन्दिर बनाउने उनको योजनामा साथ दिन गएका हुन् ?’

 सांसद देवकोटा लेख्छन्–‘नेकपा एमालेले प्रतिनिधिसभा पुर्नस्थापनालाई दुर्भाग्य भनेको र यसको देशव्यापी भण्डाफोर गर्ने निर्णय गरेको छ । भीम रावल, घनश्याम भुसाल, सुरेन्द्र पाण्डे, गोकर्ण विष्ट लगायतका तेस्रो धारका नेताले प्रतिनिधि सभा पुर्नस्थापनालाई महान र ऐतिहासिक भनेका छन् । प्रतिनिधिसभा विघटन जालसाझ र अपराध थियो भन्ने धारणासमेत उनीहरुको थियो र छ ।

अब प्रतिनिधिसभा पुनस्र्थापनालाई दुर्भाग्य भन्ने र ऐतिहासिक उपलव्धि ठान्नेका बीचको मिलनविन्दु कसरी र कहाँनेर हुन्छ ? विपरीत धु्रवका यी दुई धार सँगसँगै जान सक्लान्  ? 
निश्चित छ । सक्दैनन् । ऐतिहासिक उपलब्धी ठान्नेले ऐतिहासिक भूल भयो भन्नैपर्दछ । 
असहमतिका अरु पनि प्रशस्तै मुद्दाहरु छन । पहिला विचारमा सहमति र एकरुपता नभएसम्म भागवण्डामा रमाउनु र मिलाउनुको कुनै अर्थ छैन ।

घनश्याम भुसालका विचारका सारका आधारमा नै भन्ने हो भने तेस्रो धारका नेता र कार्यकर्ताहरुलाई अव दास बन्नुको बिकल्प छैन । मैले देख्दिनँ ।

सामूहिक नेतृत्व प्रणालीबाट एकल नेतृत्व जस्तो संविधानको भावना विपरीतको निरंकुशतातर्फ उन्मुख हुने निर्णयले नै सन्देश दिइसकेको छ । अब तिमीहरु सबै मेरै वरिपरि घुम्ने हो । पूजापाठ गर्ने हो, राममन्दिर बनाउने हो ।’