एमाले महाधिवेशन आयोजक कमिटीको बैठक बस्दै, माधव पक्षका ११ बाहेक सबैलाई निम्ता

काठमाडौँ । नेपाल कम्युनिष्ट पार्टी (नेकपा) एमाले भित्रको विवादले फेरि उग्र रूप लिने देखिएको छ । 

नेकपा एमालेको अवैध घोषणा गरिएको १०औं राष्ट्रिय महाधिवेशन आयोजक कमिटीको बैठक आजको लागि बोलाइएको छ । 

उक्त बैठकमा कारवाहीमा परेका पार्टीका नेता माधवकुमार नेपाललगायत ११ जनाबाहेक सबैलाई आमन्त्रण गरिएको नेकपा एमालेका कार्यलय सचिव शेरबहादुर तामाङले जानकारी दिएका छन्। 

सचिव तामाङका अनुसार बुधबार बिहान ११ बजे बस्ने महाधिवेशन आयोजक कमिटीको बैठकमा वरिष्ठ नेता झलनाथ खनाल, भीम रावल, रामकुमारी झाँक्री लगायत ११ जनालाई सहभागी हुन खबर गरिएको छैन ।

बुधबार बस्ने आयोजक कमिटी बैठकले महाधिवेशन आयोजक कमिटीलाई विघटन गरेर केन्द्रीय कमिटी बैठकको आह्वान हुनेछ । केन्द्रीय कमिटी बैठक बोलाइएसँगै नवौं राष्ट्रिय महाधिवेशनबाट निर्वाचित पदाधिकारी स्वतः पुनर्वहाली हुने र ११ जना नेतालाई गरिएको कारबाही समेत स्वतः निष्क्रिय हुने भएको छ ।

एमाले स्रोतका अनुसार ३ जेठ २०७५ सम्म जो जुन पदमा थिए सोही पदीय जिम्मेवारीसहित केन्द्रीय कमिटी बैठकमा सहभागी हुनेछन् । अर्थात् नेकपा एकतापछि एमालेमा फर्किएका पूर्वमाओवादी केन्द्रका नेताहरूसमेत सोही जिम्मेवारीसहित एमाले बैठकमा सहभागी हुनेछन् ।