निजामती प्रशासनतर्फ ६ सहसचिवको सचिव बढुवामा सिफारिस

काठमाडौं । निजामती प्रशासनमा प्राविधिकतर्फ सचिवका दुई पदमा ६ सहसचिवको सिफारिस भएको छ । 

मंगलबार लोक सेवा आयोगका अध्यक्ष माधव प्रसाद रेग्मीको अध्यक्षतामा बसेको बढुवा सिफारिस समितिको बैठकले कृषि तथा वन सेवा र इन्जिनियरीङमा बढुवा सिफारिस गरेको हो ।

सिफारिस हुनेमा कृषि तथा वन सेवा वरिष्ठ सहसचिव त्रय डा. कृष्ण प्रसाद आचार्य, निरु दाहाल पाण्डे र दीपक खनाल रहेका छन् । त्यस्तै, इन्जिनियरिङ सेवातर्फ प्रमिला बज्राचार्य, सुशिलचन्द तिवारी र गोपाल प्रसाद सिग्देलको नाम सिफारिस गरिएको छ । सिफारिस भएका ६ मध्ये दुई जनालाई सरकारले बढुवा गर्नेछ ।

यसअघि नै प्रशासनतर्फ बरिष्ठताको आधारमा सहसचिव दामोदार रेग्मीको बढुवा सिफारिस भइसकेको छ । प्रशासनतर्फ थप ५ पद रिक्त छन् । एक पद बिहीबारदेखि रिक्त हुँदैछ । त्यसमा पनि बढुवा सिफारिसको तयारी भइरहेको स्रोतको भनाइ छ।