भीम रावल राष्ट्रियताका प्रश्नमा सदाबहार अग्रिम मोर्चामा उभिँदै आउनुभएको छः रिजाल

काठमाडौं, ३० बैशाख । नेकपाका स्थायी कमिटी सदस्य डा. भीम रावल प्रतिनिधिसभाको अन्तर्राष्ट्रिय समितिको आइतबारको बैठकमा मन्त्रीहरुको के काम छ, समितिमा बोलाउँदा किन नआउने भन्दै आक्रामक शैलीमा प्रस्तुत भए । त्यसपछि उनको आलोचना पार्टीभित्रैबाट भइरहेको छ । उनले मन्त्रीहरुको के काम छ भनेर अवमूल्यन गरेको र भारतले नेपाली भूमि लिपुलेकमा सडक निर्माणको बिरोधमा परराष्ट्र मन्त्रालयले जारी गरेको बिज्ञप्तिमा कसैले हस्ताक्षर नगरेको बेबारिसे भन्दै बिरोध गरेका थिए । उनले भूमिब्यवस्था, सहकारी तथा गरिबी निवारण मन्त्री पदमा अर्यालले लिम्पियाधुरा कहिल्यै नेपालको  नक्सामा नभएको भनी ऋषि धमलाको रेडियोमा बोलेको बिषयमा पनि उनले कुरा उठाएका थिए ।

सरकारले भारतीय हस्तक्षेपको बिरुद्ध विज्ञप्ति निकाल्दानिकाल्दै पनि  उनले एकोहोरो बिरोध गरेको भन्दै उनको आलोचना भइरहेको छ । तर रावल तथ्यमा आधारित भएर मात्र कुनै बिषयमा बोल्ने गरेको नेकपाका केन्द्रीय सदस्य तथा विदेश विभाग उपप्रमुख बिष्णु रिजाल बताउँछन् ।

रावलको बारेमा टिकाटिप्पणी गर्नेहरुलाई जवाफ दिदै उनले लेखेका छन्–‘नेकपाका स्थायी कमिटी सदस्य डा. भीम रावल तथ्य, प्रमाण र आधारमा उभिएर तर्क गर्नुहुन्छ । उहाँका कुरा कसैलाई मन नपरे गाली गरेर होइन, उहाँले भन्दा बढी तथ्य र तर्क प्रस्तुत गरेर आलोचना गर्दा हुन्छ । शैली आ आफ्ना हुन्छन्, भीम रावलले सार्वजनिक रुपमा अप्रमाणित र तथ्यविपरीतका कुरा बोलेको रेकर्ड छैन । राष्ट्रियताका पक्षमा दृढतापूर्वक अडान राखेवापत उहाँको उछितो काढ्ने मित्रहरुलाई हेक्का भए राम्रो–  भीम रावल दुई–चार बर्षयता भवितव्यले  'राष्ट्रवादी' भएको नेता होइन । राष्ट्रियताका प्रश्नमा उहाँ सदाबहार रुपमा अग्रिम मोर्चामा उभिँदै आउनुभएको छ ।‘