आन्तरिक गृहकार्य नपुगेकोले बैठक स्थगित भएको हो – नेकपा अध्यक्ष प्रचण्ड

 काठमाडौं, २५ बैशाख । पार्टीको आन्तरिक गृहकार्य नपुगेकाले स्थायी कमिटी बैठक स्थगित भएको  नेकपा अध्यक्ष प्रचण्डले  बताएका छन् । उनले अर्का अध्यक्ष तथा प्रधानमन्त्री केपी शर्मा ओलीसँगको छलफल सकिएलगत्तै बैठक डाकिने दावी गरे ।

 उनले बैठकका लागि बाँकी आन्तरिक गृहकार्य पूरा गर्न अर्का अध्यक्ष ओलीसँग आफ्नो छलफल जारी रहेको पनि बताए। छलफल सकिएको १र२ दिनभित्रै स्थायी कमिटी बैठक आह्वान हुने उनको भनाइ छ ।

बुधबार बोलाइएको सचिवालय बैठकले स्थायी कमिटी बैठकका एजेण्डा तय गर्न नसकेपछि वैशाख २५ गतेका लागि बोलाइएको बैठक स्थगित भएको छ । अर्को बैठक कहिले बस्छ भन्ने विषय पनि अनिश्चित छ ।

प्रचण्डले आजै संसद् सभाहलको अनुगमन पनि गरेका छन् । अनुगमनपछि उनले बैठक हलमा ढुक्कसँग बस्ने वातावरण बनेको बताए ।

कोरोना भाइरसको सम्भावित संक्रमणबाट जोगिन संसद् सचिवालयले सतर्कता बढाएको छ । यही क्रममा बिहीबार सांसद् तथा संसद सचिवालयमा कार्यरत कर्मचारीलगायतको स्वाब संकलन गरिएको छ । कोरोना नरहेको प्रमाणपत्र देखाएर मात्रै संसद् भवनमा प्रवेश दिइने संसद् सचिवालयले जनाएको छ ।