काठमाडौं, २५ वैशाख । कोरोना संक्रमणका बीच संसदको बजेट अधिवेशन भोलिबाट सुरु हुँदैछ । बजेट अधिवेशनमा भाग लिनका लागि सांसदहरुलाई सामाजिक दूरीसहित भाग लिनसक्ने ब्यवस्था मिलाइएको छ । र, संसदमा भाग लिनका लागि पीसीआर प्रविधिबाट दुवै सदनका सांसदको कोरोना परीक्षण भइरहेको छ ।
आज भएको कोरोना परीक्षणको रिपोर्ट भोलि आएपछि मात्र सांसदहरुले बैठकमा भाग लिन पाउनेछन् । प्रतिनिधिसभाका सभामुख अग्नि सापकोटाको कोरोना जाँचका लागि स्वाब संकलन गरिएको छ ।
संघीय संसदको अधिवेशन सुरु हुनुअघि सबैको पिसिआर विधिबाट कोरोना परीक्षण गर्ने निर्णय अनुसार सापकोटाको पनि स्वाब संकलन गरिएको हो । बानेश्वरस्थित अन्तर्राष्ट्रिय सम्मेलन केन्द्रमा सभामुख सापकोटासहित सबै सांसदको स्वाब लिने कार्य जारी छ ।
