रसुवा, नुवाकोट र धादिङका विपद् प्रभावितलाई स्वास्थ्य बिमा सेवामा सहुलियत

काठमाडौँ । स्वास्थ्य बिमा बोर्डले बाढीबाट प्रभावित रसुवा, नुवाकोट र धादिङका नागरिकलाई स्वास्थ्य बिमा सेवा सहज रूपमा उपलब्ध गराउन विशेष व्यवस्था गरेको छ।

बोर्डले प्रेस विज्ञप्ति जारी गर्दै तीनवटै जिल्लाका स्वास्थ्य बिमा सेवा प्रदायक स्वास्थ्य संस्थामा तोकिएको अवधिसम्म सेवाग्राहीले तिर्नुपर्ने सहभुक्तानी (को-पेमेन्ट) र उपचार खर्चको अधिकतम सीमा (क्यापिङ) हटाउने निर्णय भएको जनाएको छ।

रसुवाको लेहेन्दे खोलाबाट आएको अप्रत्याशित बाढीबाट रसुवा, नुवाकोट र धादिङ अति प्रभावित भएपछि सरकारले ती जिल्लालाई तीन महिनाका लागि विपद् संकटग्रस्त क्षेत्र घोषणा गरेको सन्दर्भमा यस्तो निर्णय गरिएको बोर्डले जनाएको छ।

बाढीबाट प्रभावित व्यक्तिसँग स्वास्थ्य बिमा परिचयपत्र नभएको अवस्थामा पनि सेवा उपलब्ध गराइने भएको छ। त्यस्ता व्यक्तिलाई सेवा प्रदायक स्वास्थ्य संस्थाले उपलब्ध गराइएको ‘आईएमआईएस(युजर’ प्रणालीमार्फत स्वास्थ्य बिमा नम्बर पहिचान गरी सेवा दिनुपर्नेछ।

बोर्डले तीनवटै जिल्लाका सेवा प्रदायक स्वास्थ्य संस्थालाई निर्णय कार्यान्वयन गरी नागरिकलाई सहज रूपमा स्वास्थ्य बिमा सेवा उपलब्ध गराउन निर्देशन दिएको छ।

स्वास्थ्य बिमा बोर्डका प्रवक्ता एवं वरिष्ठ मेडिकल सुपरिन्टेन्डेन्ट डा। पवनकुमार साहले बोर्डको निर्णयबारे सम्बन्धित सबैलाई जानकारी गराएका छन्।