रवि लामिछानेको चीन भ्रमण स्थगित, सांसदको टोली जाँदै

काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेको चीन भ्रमण स्थगित भएको छ । उच्च स्रोतका अनुसार लामिछानेको चीन भ्रमण हाललाई स्थगित भएको हो ।

यही भदौ पहिलो साता चीन भ्रमणमा जाने लामिछानेको कार्यक्रम हाललाई रोकिएको हो। नयाँ मिति तय भइनसेक पनि अब लामिछाने असोज (मध्य सेप्टेम्बर) तिर चीन भ्रमणमा जाने सम्भावना रहेको स्रोतहरूले जनाएका छन्।

लामिछाने भदौ ७ देखि १४ गते (अगस्ट २३ देखि ३०) सम्म आठ दिने चीन भ्रमणमा जाने गरी कार्यक्रमहरूको तयारी भइरहेको थियो।

लामिछानेले पत्नी निकिता पौड्यालसहित पाँच सदस्यीय प्रतिनिधिमण्डलको नेतृत्व गर्ने र बोइजिङपछि तिब्बतको कैलाश मानसरोवरसम्म जाने तयारी भएको थियो।

चीनका राष्ट्रपति सी चिनफिङसँग भेट नहुने र देशभित्रकै परिस्थिति पनि केही फेरिएको अवस्थामा लामिछानेले तत्कालका लागि भ्रमण स्थगित गरेको स्रोतहरूले जनाएका छन्।

यसैबिच सांसदहरूको एक टोली ७ दिनका लागि चीन भ्रमणमा जाने तय भएको छ।