न प्रधानमन्त्रीले राजीनामा दिनुहुन्छ न वामदेव प्रधानमन्त्री बन्नुहुन्छः सांसद चौधरी

काठमाडौं, २१ बैशाख ।

शनिबार बसेको नेकपा सचिवालय बैठकले उपाध्यक्ष वामदेव गौतमलाई उपयुक्त समयमा प्रतिनिधिसभाको सांसद बनाउने निर्णय गरेको छ । उक्त निर्णयपछि गौतमलाई पाल्पा १ बाट सांसद दलबहादुर रानालाई राजीनामा गराएर उम्मेदवार बनाउने चर्चा भइरहेको छ । तर नेकपाकै नेताहरु यो कुरा मान्न तयार छैनन् । गण्डकी प्रदेशका मुख्यमन्त्री पृथ्वीसुब्बा गुरुङले वामदेव गौतमलाई प्रधानमन्त्री बनाउने कुरा संभव नभएको अभिब्यक्ति दिएका छन् । नेकपाका सांसद मेटमणि चौधरीले सामाजिक संजालमै गौतमलाई प्रधानमन्त्री बनाउने कुरा संभव नभएको उल्लेख गरेका छन् ।  
 
सांसद चौधरीले लेखेका छन्–नेपाल कम्युनिष्ट पार्टीका सचिवालय सदस्य कमरेड बामदेव गौतम छलकपट नभएको सोझो र इमान्दार ब्यक्तित्व हो । आफूजस्तै अरूलाई देख्ने मानवीय प्रबृत्ति नै हो । यसैले उहाँलाई पटक पटक मजाकका रूपमा लिँदै विभिन्न पद र जिम्मेवारीमा बलि चढाउने काम भइरहेको छ । यस बिषयमा पार्टी र स्वयं बामदेव गौतमले ध्यान पुर्याउनु जरूरी छ ।

अनावश्यक महत्वकांक्षा जगाइदिने, बैधानिक ब्यवस्था नभएको पद सिर्जना गरी बामदेबलाई नेकपाको उपाध्यक्ष बनाइयो । स्मरण रहोस्, विगतमा २०५१ मा उपमहासचिव पद र अहिले पनि उपाध्यक्ष पद सिर्जना गरी लगिएको छ । पार्टीभित्रको आन्तरिक द्वन्द्व ब्यवस्थापनको लागि अत्याधिक उपयोग गर्ने, बिधानमा नभएको पद सिर्जना गर्ने कार्य अहिले पनि पुनराबृत्ति भएको छ ।

हिजोको सचिवालयको बैठकमा पनि पुनः उहाँसँग सम्बन्धित निर्णय भएको छ, उपयुक्त समयमा प्रतिनिधिसभाको चुनाव गरी प्रधानमन्त्री बनाउनेसम्मको कार्य गर्ने । यसको मतलब वर्तमान प्रधानमन्त्रीले राजीनामा दिनुपर्दछ । जबकि सम्बन्धितहरूका नियति, विगतका अनुभव र भोगाई साथै हाल र भोलिको समय विश्लेषण गर्दा त्यो संभव नै छैन । यसैले आफ्नो रक्षाका लागि पटक पटक कमरेड बामदेब गौतमको हुर्मत नलिऊँ र कमरेड बामदेव पनि आफूलाई हल्का र कमजोर बनाउनेगरी कुनै पनि कदम अगाडि नबढाउनुहोस् ।