आईजीपीमाथि अपराधिक दुर्व्यवहार, अराजक अभिब्यक्ति दिने सांसदलाई तत्काल निलम्बन गर्न रविलाई सुझाव

रेशम पराजुली

बेनामी उजुरी खडा गरी त्यसकै आधारमा अध्यक्ष हुँदाहुँदै सांसद खगेन्द्र सुनारले गृहसचिव र प्रहरी महानिरीक्षकलाई जुन व्यवहार गरेका छन्, त्यो सरासर बिधि शास्त्रीय तथा नैतिक दृष्टिकोणबाट गलत हो । शंकाको भरमा नै कुनै अनुसन्धान छानबिन नगरी जसरी भ्रष्टाचार भएको ठोकुवा गरियो, एउटा काममा बोलाएर नभएको चोरीको कुरा अगाडि सारेर झपारियो । जुत्ता–मोजा खाने जस्ता अमर्यादित र लज्जाजनक अभिव्यक्ति के शोभनीय हुन् ?

आईजीपीले सत्य कुरा बोल्न थालेपछि सहन नसकी आरोप लगाउने मिटिङ बीचबाटोमा छाडेर हिंडे । केही समय ढिला आउँदा गृहसचिवको हुर्मत लिने व्यक्तिले किन बीचमै कसको आदेशले मिटिङ बहिस्कार गरेर निस्किए ? त्यसरी ढिला आउँदा हपार्नेले आआफैं मिटिङ बहिस्कार गर्न कुन नैतिकताले दिएको हो ?

माननीयज्यू, एउटा कुरा के बुझ्नु भने आईजीपी तपाईंको घरमा काम गर्न बसेको नोकर नभई ८० हजार प्रहरीको सर्वोच्च कमाण्डर हो । ऊ एउटा पदमात्र होइन संस्था हो ।
जहाँसम्म प्रहरीको टेण्डरमा घोटाला गर्ने कार्य सतहमा आउन थालेको कृष्णप्रसाद सिटौला गृहमन्त्री हुँदादेखि हो । उनैले तोकेको सुजाता कोइरालाको बंगलादेशी ज्वाइँ रुवेल चौधरीलगायतका ठेकेदारलाइ ठेक्का दिन बाध्य गराउँदा नेपाल प्रहरीका होनाहार ६ जना पूर्व र बहालवाला आईजीपीहरु भ्रष्टाचारमा जेल गएका हुन् । उनीहरुले वास्तविक कुरा खोल्न नसकेर जेल गए, त्यसपछि प्रहरी बोल्दैनन् । यिनलाई जे गरे पनि हुन्छ भन्ने कुभावनाको विकास भएको हो ।

त्यही समयदेखि ठेकेदारहरुको दुई समूहबीच कडा प्रतिस्पर्धा छ । एउटा आईजीपी आउँदा ठेकेदारको एक समूह सलबलाउँछ अर्को आईजीपी आउँदा अर्को समूह सलबलाउँछ । एक समूहले पाएसम्म अर्कोलाई सिध्याउने खेल खेल्न पछि पर्दैनन् ।

निर्वाचन प्रहरीको लत्ताकपडा लगायतको सरसामान खरिदमा पनि यही भएको हो । जुन समूहले ठेक्का पाएन । हो, त्यही समूह तपाईंको साखुल्ले भएको हो । तपाईं शक्तिमा आउँदा यो समूहले तपाईं (खगेन्द्र सुनार) लाई चिन्दा पनि चिन्दैनथ्यो । आज तपार्ईं शक्तिमा हुनुहुन्छ, लेखासमितिमा हुनुहुन्छ, त्यसकारण तपाईंलाई नभएको कपोकल्पित सूचना दिएको छ र तपाईंलाई भनेको छ कि हाम्रो नाम गोप्य राखिदिनुहोस् ।

त्यही समूहले टेण्डर बिड गर्यो, परेन तुरुन्तै रोक्न सर्वोच्च अदालतमा रिट हाल्यो, गृहमा हाल्यो, अख्तियारमा हाल्यो, छद्म र बेनामी । केही लागेन अनि तपाईंको शरणमा आयो । हो, त्यसैले हो आईजीपीको घरमा ३ करोड चोरी भयो भनेर गलत सूचना दिएको । असल मनसाय भएको व्यक्तिले कहिल्यै नाम गुमनाम राखेर सूचना दिंदैन ।
त्यसैले आवेशमा आएर गलत निर्णय गर्ने, अपशब्द प्रयोग गर्ने जुत्ता–मोजा खाने, घिसारेर लैजाने जस्ता कानूनविपरीत हुने अभिव्यक्ति दिन रोक्नुहोस् ।

सांसदज्यू, यस्ता नराम्रो बचन नबोल्नुहोस् । तपाईंको वचन अव रास्वपाको वचन हुन्छ । हेक्का राख्नुहोस् कि तपाईंलाई जनताले अत्याधिक मत दिएर कानुन बनाउने ठाउँमा पठाएका हुन् ।

हेक्का राख्नुहोस् कि तपाईंलाई जनताले अत्याधिक मत दिएर सांसद बनाएका हुन्, कानुन बनाउनका लागि । तपाईलाई यिनै ठेक्का नपाउने ठेकेदारदेखि स्वार्थी समूहले बेवकुफ बनाउँदैछन् । किनकि तपाईंको कमजोरी कसैले केही भनेमा विश्वास गरिहाल्ने स्वभावको देखिएको छ । हो, यही कमजोरीको फाइदा स्वार्थ समूहले उठाउँदैछन् ।

रास्वपा सभापति रवि लामिछानेज्यू तपाईं न्यूज २४ मा रहँदा सिधा कुरा जनतासँग र सो बाट प्राप्त सूचनालाई कार्यान्वयनमा ल्याउन काठमाडौंदेखि सोलुखुम्बु जिल्लासम्म व्यवहारमा उतार्न सहजकर्ता र सहयोगीको भूमिका निर्वाह गरेको छु ।

तपाईं पहिलो पटक गृहमन्त्री हुँदा तपाईंलाई सामाजिक सञ्जालबाटै ‘गृह प्रशासनको चुनौती र समाधान’का बारेमा खुलापत्र चर्चित अनलाइनमा छपाउन खोज्दा तपाईंले ठोकुवा गरेका १२ भाइले छाप्न मानेनन् । र, एउटा नयाँ अनलाइनबाट छापेर तपाईंलाई शुभकामना तथा सफलताको कामनाका साथ १० बुँदे सुझाव र समाधानका उपाय सुझाएको थिएँ । त्यो निकै भाइरल बन्यो । आज म केही समयलाई छिमेकी मुलुकमा छु र यहीबाट यो बोधार्थ पत्र लेखिरहेको छु ।  तपाईंले पार्टीको साख गिराउने तत्वका बारेमा पार्टीभित्र र बाहिर समेत अर्जुनदृष्टि लगाउनुहोला ।

त्यसैगरी कानून, न्याय तथा संसदीय मामिला मन्त्री सोविता गौतमजीले पनि आफ्ना सासंदहरुको गैरकानुनी अभिव्यक्तिलाई रोक्न प्रयास गर्नुहोला । यस्ता अभिव्यक्तिले पार्टीको हित गर्दैन । यस्ता अराजक अभिब्यक्ति दिने, सुरक्षा संगठनका प्रमुखको हुर्मत लिने सांसदलाई तत्काल निलम्बन गर्नुहोस् ।

गएको जेठमा तपार्ईले सिन्धुलीमा गएर हिन्दी चलचित्र दबङ्ग स्टाइलमा जुन अराजक अभिब्यक्ति दिनुभयो । त्यतिबेला तपाईले आलो काँचो, शान्त भीडलाई उत्तेजित पार्ने काम गर्नुभएको थियो । कानुनी राज्यमा एउटा ल मेकरले खेल्नुपर्ने भूमिका भन्दा पनि कानून नै नमान्ने हचुवामा पोष्टमोर्टम गर्नैपर्दैन, त्यसै प्रमाणित भयो, प्रहरीले कुटपिट गरेर मारेको भनेर पीडित पक्षलाई उकास्नुभयो । यस्तो अराजक र हचुवाका आधारमा जुन अभिब्यक्ति दिनुभयो, अहिले लेखासमितिमा बेनामी उजुरीका आधारमा प्रहरी संगठनमाथि अमर्यादित टिप्पणी पनि हचुवाकै भरमा दिएको पुष्टि हुन्छ ।