‘नेपालीलाई ५० हजार जरिवाना तिराउनुपर्छ’ भन्ने मन्त्री पुनको अभिब्यक्ति विवादमा, बिरोधपछि फिर्ता लिए

काठमाडौं । विज्ञान, प्रविधि तथा नवप्रबर्तन मन्त्री महावीर पुनले ‘नेपालीहरु अटेरी छन्, ट्राफिक नियम उल्लघंन गर्नेलाई ५० हजार रुपैयाँ जरिवाना लगाउनुपर्छ’ भन्ने अभिब्यक्ति विवादमा परेपछि फिर्ता लिएका छन् । र, एक बर्षसम्म मिडियासँग नबोल्ने घोषणा गरेका छन् ।

पठाओ चलाएर जीवीकोपार्जन गर्दैआएका मुगुका गणेश नेपालीको मोटरसाइकलमा काठमाडौं महानगरका प्रहरीले ह्वीललक गरेपछि उनले बिहीबार त्रिपुरेश्वरस्थित राहदानी बिभागको मूलगेटमा आफ्नो शरीरमा आफैं आगो लगाएर आत्मदाह गरेका थिए । पठाओ चलाएर परिवारको भरणपोषण गर्दैआएका नेपालीले जरिवाना तिर्नुपर्ने भएपछि आत्मदाह गरेका थिए ।

आत्मदाह गरेपछि वीर अस्पतालमा लगिएका नेपालीलाई चिकित्सकले शुक्रबार मृत घोषणा गरेका थिए । मृत घोषणा गरिएका नेपालीको अवस्था बिहीबार राति नै चिन्ताजनक थियो । उनलाई बचाउन नसक्ने जनाउ चिकित्सकहरुले सरकारका जिम्मेवार अधिकारीलाई दिइसकेका थिए । तर सरकारले लाज बचाउन र संभावित बिरोध मथ्थर पार्न भारतमा उपचार गर्न लाने भनेर मिडियामा समाचार प्रवाहर गरायो । बिहीबार राति त्रिभुवन अन्तर्राष्ट्रिय विमानस्थलमा गृहमन्त्री सुधन गुरुङले विमान तयार गरेको स्टन्टबाजी समेत गरेका थिए ।

सरकारका मन्त्रीहरुको स्टन्टबाजी र नेपाली नागरिकका बारेमा दिएका अशिष्ट अभिब्यक्तिको चौतर्फी बिरोभ भइरहेको छ । प्रतिनिधिसभाको शुक्रबारको बैठकमा राप्रपाका संसदीय दलका नेता ज्ञानेन्द्र शाहीले सरकार करोडपति अरबपतिहरुको मात्र भएको तर गरिब गणेश नेपालीहरुको पक्षमा नभएको उल्लेख गर्दै गृहमन्त्रीले स्टन्टबाजी गरेको बताएका थिए ।

पूर्वअर्थमन्त्री रामेश्वरप्रसाद खनालले मन्त्रीहरुका विवादित अभिब्यक्तिलाई लिएर चिन्ता प्रकट गरेका छन् । उनले सामाजिक संजालमा मन्त्रीमा विनयशीलता फिटिक्कै नदेखिएकोमा चिन्ता प्रकट गरेका हुन् । खनालले गृहमन्त्री सुधन गुरुङ र विज्ञान प्रबिधि मन्त्री महावीर पुनको अभिब्यक्तितर्फ संकेत गर्दै लेखेका छन्–जे भैरहेको छ, सबै ठीक भएको छैन ! उनीहरू खराब थिए, यी पनि खराबै रहेछन्, कुनै पार्टी ठीक छैनन् भन्ने मत बढ्दै जानु कदापि राम्रो होइन । स्थिति सुधार्ने प्राथमिक दायित्व सत्ताकै हो। तर केही मन्त्रीमा विनयशीलता फिटिक्कै देखिएन !!!