रास्वपामा उकुसमुकुस, कवितामार्फत् बिष्फोट

काठमाडौं ।  प्रधानमन्त्री वालेन्द्र शाहको कार्यशैलीबाट रास्वपामा असन्तुष्टि चुलिएको छ । १ सय ८१ पार्टीका सांसद पार्टीका हुँदाहुँदै स्वतन्त्र सांसद महावीर पुन विवादित पात्र सुधन गुरुङलाई पुनः मन्त्री बनाएपछि पार्टीभित्र असन्तुष्टि चुलिएको छ । पार्टीका सहमहामन्त्री तथा सांसद विपिनकुमार आचार्यले सामाजिक संजालमा भूपि शेरचनको कविता उद्दरण गर्दै असन्तुष्टि पोखेका छन् ।

हामी पाइतला हौँ,
केवल पाइतला,
र फगत पाइतला ।
पाइतला—
जसको भरमा शरीर उभिन्छ ।
पाइतला—
जसको आधारमा शरीर हिँड्छ ।
पाइतला—
जसको भरोसामा शरीर दगुर्छ ।
पाइतला—
तर जो भन्ठान्छ कि
शरीरले कृपा गरेर उसलाई पालिरहेछ,
दया गरेर उसलाई सँगसँगै हिँडाइरहेछ ।
मक्ख पर्छ शरीरको महानतामाथि,
र सधैँ सम्पूर्ण शरीरको भार सहन्छ ।
सधैँ शरीरको सबभन्दा तल रहन्छ,
कहिल्यै शिर उचालेर माथि हेर्दैन,
सधैँ–सधैँ नतमस्तक रहन्छ ।
हामी पाइतला हौँ ।
हामी दौडमा प्रथम हुन्छौँ,
र हाम्रो निधारले टीका थाप्छ ।
हामी दौडमा प्रथम हुन्छौँ,
र हाम्रो घाँटीले माला लाउँछ ।
हामी दौडमा प्रथम हुन्छौँ,
र हाम्रो छातीले तक्मा टाँस्छ ।
हाम्रो टीका थाप्ने निधार अर्कै छ,
हाम्रो माला लाउने घाँटी अर्कै छ,
हाम्रो तक्मा टाँस्ने छाती अर्कै छ ।
हामी त फगत कसैको इशारामा
टेक्ने, हिँड्ने र दगुर्ने पाइतला हौँ—
केवल पाइतला,
र फगत पाइतला ।
नागरिक र नेताको कथा २ भूपि