गैरकानुनी सम्पत्ति आर्जन गर्ने गाउँपालिका अध्यक्ष गुप्ताबिरुद्ध मुद्दा दायर, साढे ३ करोडभन्दा बढी बिगो दाबी

काठमाडौं । अख्तियार दुरुपयोग अनुसन्धान आयोगले नवलपरासी (बर्दघाट सुस्ता पश्चिम)को पाल्हीनन्दन गाउँपालिकाका अध्यक्ष बैजुप्रसाद गुप्ता र उनका परिवारका सदस्यहरुका बिरुद्ध भ्रष्टाचार गरी गैरकानुनी रुपमा सम्पत्ति आर्जन गरेकोमा विशेष अदालतमा मुद्दा दायर गरेको छ ।

गुप्ताका बिरुद्ध ३ करोड ५१ लाख ५२ हजार ६ सय २० रूपैयाँ अठासी पैसा बिगो माग दाबी गर्दै सोमबार आयोगले मुद्दा दर्ता गरेको हो ।

गुप्ताले पाल्हीनन्दन गाउँपालिकाको अध्यक्ष पदमा निर्वाचित भएको २०७४ असार २० गतेदेखि २०७९ असार २८ गतेसम्मको अवधिलाई जाँच अवधि कायम गरेको थियो ।

अध्यक्ष गुप्ताले सार्वजनिक सेवाको पदमा रहँदाका बखत अख्तियारको दुरूपयोग गरी गैरकानुनी रूपमा आर्जन गरेको सम्पत्ति एकासगोल परिवारको नाममा समेत रहेको देखिंदा गुप्ता र उनको बुबा बंशराज गुप्ता, आमा धानमती तेली, श्रीमतीहरू सुलोचना गुप्ता र शारदा आचार्य गुप्ता उपर पनि मुद्दा दर्ता गरेको छ ।

गुप्तासँग बिगो माग दाबी गरिए पनि परिवारका सदस्यहरुलाई भने सम्पत्ति जफतको प्रयोजनका लागि मात्र मुद्दा दर्ता गरेको आयोगले जनाएको छ ।