पर्साबाट १०२ केजी गाँजासहित एक भारतीय नागरिक पक्राउ

काठमाडौँ । जिल्ला पर्सा जगरनाथपुर गाउँपालिका २ स्थित इलाका प्रहरी कार्यालय जानकीटोलाबाट खटिएको प्रहरी गस्ती टोलीले १०२ केजी ६३८ गाँजासहित एक जना भारतीय नागरिकलाई पक्राउ गरेको छ।

जिल्ला पर्सा जगरनाथपुर २ सोनबर्साबाट भारततर्फ जाँदै गरेको बिआर ०१ सी यु ५४४ नम्बरको सेतो स्पोर्ट्स कारलाई जाँच गर्ने क्रममा कारभित्र लुकाइराखिएको १० पोका गाँजा बरामद गरिएको हो । बरामद गाँजाको तौल १०२ केजी ६३८ ग्राम रहेको छ।

घटनामा कार चालक भारतको बेतिया, नवलपुर बस्ने अन्दाजी ३२ वर्षका गुडु बर्मालाई गाँजा र कारसहित नियन्त्रणमा लिइएको छ ।

पक्राउ परेका व्यक्ति, बरामद गरिएको गाँजा तथा सवारी साधनलाई थप अनुसन्धान तथा आवश्यक कानुनी कारबाहीका लागि इलाका प्रहरी कार्यालय पोखरियामा राखिएको छ ।