ब्यापारीबीचमै पोल खोलाखोल, जैसवालको गोदाम देखाएपछि रौतहटमा ९० लाखको फर्सीको बीउ बरामद

गौर । चीनबाट नेपाल हुँदै अबैध रुपमा भारत लैजान लागेको ९० लाख रुपैयाँ मूल्य बराबरको फर्सीको बीउ बरामद गर्ने क्रममा स्थानीय र प्रहरीबीच झडप भएको छ ।

बुधबार साँझ रौतहटकोे बौधीमाई नगरपालिका–७ बाँडा बंकुल टोलस्थित नेपाल–भारत सीमावर्ती क्षेत्रमा लुकाइ भण्डारण गरिएको ठूलो परिमाणको फर्सीको बिउ प्रहरीको भन्दा पनि ब्यापारीबीचको आपसी विवादले बरामद भएको स्रोतले बताएको छ ।

स्रोतका अनुसार सो नाकाबाट ब्यापार गर्ने धर्मेन्द्र जैसवाललाई मात्र गरुडा एरियाबाट तस्करीको लाइन दिएपछि अरु ब्यापारीले प्रहरी र सशस्त्र प्रहरीलाई गोदाम नै देखाएर बरामद गराएका हुन् । जिल्ला प्रहरी कार्यालय रौतहटका एसपी सिताराम रिजालले बरिष्ठ सई राजेन्द्र गिरीमार्फत् सेटिङ गरी जैसवाललाई मात्र लाइन दिएपछि अरु ब्यापारी रुष्ट भएका थिए ।

फर्सीको बियाँ लुकाएर राखेको जैसवालको गोदाम तिनै ब्यापारीले प्रहरीलाई देखाएपछि बरामद गर्न बाध्य भएको थियो । प्रहरीले घटनास्थलबाट ३ सय २२ बोरा फर्सीको बिउ बरामद गरेको छ । प्रतिबोरा ४० किलोग्रामका दरले कुल १२ हजार ८८० किलोग्राम बरामद फर्सीको बिउको प्रतिबोरा २८ हजार रुपैयाँका दरले मूल्यांकन गरी प्रहरीले ९० लाख १६ हजार रुपैयाँ बराबरको बिउ बरामद गरेको जनाएको छ ।

रौतहटका नाकाबाट एसपी रिजालले खटाएका घुमुवा बरिष्ठ सई गिरीकै सेटिङमा फर्सीको बियाँ, चिनियाँ स्याउ, मदिरा लगायतका सामान भारततर्फ तस्करी हुने गरेको छ । भारतबाट कपडा, माछा, किराना सामानको तस्करी हुने गरेको छ ।

उक्त फर्सीको बियाँ बरामदका क्रममा स्थानीय र प्रहरी बीच झडप हुदा ६ जना घाइते भएका छन् थिए ।

दुवै पक्षबीच भएको झडप नियन्त्रणमा लिन प्रहरीले चार राउन्ड अश्रुग्यास र रबर बुलेट समेत चलाएर स्थिति नियन्त्रणमा लिएको जिल्ला प्रहरी कार्यालय रौतहटले जनाएको छ ।