प्रहरीको संरक्षणमा रौतहटमा अबैध जुवा, एसपीको आडमा घुमुवाको सेटिङ

गौर । जिल्ला प्रहरी कार्यालय रौतहटबाट खटिएका घुमुवाको संरक्षणमा बिभिन्न ठाउँमा जुवा अखाडा संचालन हुँदैआएका छन् । घुमुवाहरुले मासिक दररेट अनुसार असुली गरी जुवातास खेल्न खेलाउन छुट दिएको आरोप छ ।

जिल्लाका एसपी सिताराम रिजाललाई समेत मासिक बुझाएर कटहरियामा जुवा अखाडा संचालन हुँदैआएका स्रोत बताउँछ । स्रोतका अनुसार नसरुद्धिन र कुशवाहाले मासिक एसपी र घुमुवाहरुको लागि छुट्टाछुट्टै दररेट बुझाएर जुवा खेलाउने गरेका छन् । एसपीको नाममा १ लाख ५० हजार मासिक रुपैयाँ जुवा खेलाउनेले घुुमुवामार्फत बुझाउने गरेको स्रोत बताउँछ । घुमुवालाई मासिक ५० हजारको दररेट बुझाइ कटहरियामा खुलेआम जुवा खेल्ने खेलाउने गरिएको छ ।

जिल्लाका एसपी रिजालले खटाएका हवल्दार ध्रुव यादवले जुवाको सेटिङ गरेका छन् । मधेश प्रदेश प्रहरी कार्यालयबाट खटाइएका घुमुवा यादवले नै जुवादेखि तस्करीको सेटिङ मिलाएर मासिक रुपमा एसपी रिजाललाई हिस्सा बुझाउने गरेको स्रोतको दाबी छ । मधेश प्रदेश प्रहरी कार्यालयका प्रशासनका इन्स्पेक्टर खेमप्रसाद नेपालले सुुटुक्क रौतहटमा खटाएका हवल्दार यादवका कारण रौतहटमा पुनः जुवा र तस्करी निर्वाध चल्न थालेको गुनासो आएको छ ।

घुमुवाका रुपमा जिल्लामा असुलीमा बदनाम भएपछि नेत्रमणि गिरी एसपी हुँदा एक बर्षअघि हवल्दार ध्रुव यादव गणमा तानिएका थिए । तर, तिनै बदनाम घुमुवा यादवलाई प्रदेश प्रहरी कार्यालयका इन्स्पेक्टर नेपालले डीआईजी गोविन्द थपलियालाई समेत गुमराहमा राखी रौतहटमै पठाइदिएका छन् ।

रौतहटमा सरुवा हुनासाथ जिल्लाका एसपी सिताराम रिजालले हवल्दार यादवलाई घुमुवाका रुपमा खटाएका छन् । र, यादवले जुवादेखि तस्करीको नेटवर्क चलाउन थालिसकेका छन् । एसएसपी कमल थापासँग मिलेर इन्स्पेक्टर नेपालले रौतहट, सर्लाही लगायतका जिल्लामा घुमुवा प्रहरी बसिसकेकाहरुलाई पुनः लाभ लिंदै फर्काउने अभियान सुरु गरिसकेका छन् । रौतहटमा विगतमा असुलीमा विवादमा आएका हवल्दार ध्रुव यादवबाट पनि लाभ लिएरै नेपालले फेरि फर्काएको आरोप छ ।

मधेश प्रदेश प्रहरी कार्यालयको प्रमुखका रुपमा डीआईजी गोविन्द थपलिया जनकपुरमा गएर कमाण्ड सम्हालेको केही दिनमै बाराबाट गणमा तानिएका थिए प्रहरी निरीक्षक खेमप्रसाद नेपाल । जिल्ला प्रहरी कार्यालय बाराबाट सादा पोशकमा खटिएका इन्स्पेक्टर नेपालको टोली आर्थिक असुलीमा विवादमा परेपछि उनीसमेतका घुमुवाहरुलाई गणमा तानिएको थियो । तर, कारबाहीस्वरुप तानिएका तिनै इन्स्पेक्टर नेपाल मधेश प्रहरी कार्यालयको प्रशासनमा पुगेका छन् । र, एसएसपी कमल थापासँग मिलेर तल्लो दर्जाका प्रहरीसँग लाभ लिंदै जिल्ला जिल्लामा सरुवा गर्न तल्लीन रहेको आरोप छ । नेपालले मधेश प्रदेशका ८ वटै जिल्लाबाट तानिएका घुमुवा पुनः  जिल्लामा फर्काइरहेका छन् ।