वीर अस्पतालको खरिदमा भ्रष्टाचार, लेखा अधिकृत राईबिरुद्ध अख्तियारमा उजुरी

काठमाडौैं । वीर अस्पतालमा मेडिसिन र सर्जिकल ब्यापारीलाई भुक्तानी दिंदा पहिल्यै भुक्तानी रकमको १० प्रतिशत नगदै नजराना लेनदेन हुने गरेको छ । अस्पताल फार्मेसी टेन्डरमा आफूनिकट वा आफूलाई कमिसन दिने फर्मलाई छनोट गर्न दबाब दिने गरिएको छ ।

अस्पतालमा करार कर्मचारीको म्याद थप्नुपर्दा लेखाको राय दिंदा कर्मचारीसँग बार्गेनिङ गर्ने गरेको आरोप लेखा अधिकृत वीरसिंह राईले लिने गरेको उजुरी अख्तियार दुरुपयोग अनुसन्धान आयोगसहितका निकायमा परेको छ ।

अस्पतालमा बिरामीलाई खुवाउने खाना, खाजा, अक्सिजन र पानीमा पनि ब्यापारीले पहिल्यै कमिसन दिनुपर्ने बाध्यता रहेको उजुरीमा उल्लेख छ । कमिसन नदिए दुःख दिंदै भुक्तानी रोक्का राख्ने गरिएको छ । लेखाप्रमुख राईले अस्पतालमा अत्यावश्यक प्रयोगशाला केमिकलको टेण्डर फाइल अघि नबढाउँदा आज (२०८२ चैत ३) देखि अस्पतालका जाँचपड्तालहरु बन्द भई गरिब बिरामी निजी अस्पताल जान बाध्य हुँदैआएका छन् ।

वीर अस्पतालको खरिद शाखाका एक कर्मचारीको प्रश्न छ–‘राई वीर अस्पतालको प्रयोगशाला जाँच बन्द गराई कतै निजी अस्पताल र अस्पताल कम्पाउण्डसँगै रहेको क्लिनिकसँग कमिसन त लिँदैछैनन् ?’ तत्कालै बिग्रिएका सामान मर्मत गर्दा पनि भुक्तानी दिँदा व्यापारीलाई यो मिलेन त्यो मिलेन भन्दै दुःख दिने गरिएको छ । सबै कर्मचारीलाई आफू अख्तियारमा बसेर आएको हुँ भन्दै यस्तो अनियमितता गर्दैआएको उजुरीमा उल्लेख छ ।

उजुरीमा उल्लेख छ–राईले भनेको नमाने वा उचित कमिसन नदिए उल्टै अख्तियार लगाइदिन्छु भन्दै तर्साउने गरेका छन् । राईका कारण अस्पतालका कर्मचारी त्रसित छन् । अख्तियारले उनी अस्पताल गएपछि भएको ब्यापारिक गैरकानुनी भुक्तानी तथा अन्य रोक्का फाइल अध्ययन गर्न पनि उजुरीमा अनुरोध गरिएको छ । लेखाअधिकृत राई अस्पतालमा सरुवा भएर आएदेखि नै विवादमा परेका छन् ।

अस्पतालमा व्यापक अनियमितता गरेको भन्दै अस्पतालमा कार्यरत कर्मचारीले प्रधानमन्त्री कार्यालय, राष्ट्रिय सर्तकता केन्द्र अर्थमन्त्रालय, महालेखा नियन्त्रकको कार्यालयमा उजुरी दिएका छन् । अस्पताल सुधार अभियान–२०८२ को नाममा अख्तियारमा उजुरी परेको छ । वीर अस्पतालको खरिदमा भएको भ्रष्टाचार र अख्तियारमा परेको उजुरीका बारेमा लेखाअधिकृत राईसँग प्रतिक्रियाका लागि प्रयास गर्दा सम्पर्क हुन सकेन । सम्पर्क भएपछि उनको प्रतिक्रिया राख्ने नै छौं ।