वीर अस्पतालको क्यान्टिनमा करोडौंको चलखेल, उपकुलपति बस्नेतकै मिलेमतो

शिवकुमार थापा

काठमाडौं । चिकित्सा विज्ञान राष्ट्रिय प्रतिष्ठान(न्याम्स), वीर अस्पतालको चमेनागृह सञ्चालनका लागि अनुमति दिँदा नै ठूलो आर्थिक चलखेल भएको एक जना प्रतिस्पर्धिले बताएका छन् । हाल स्वीकृत गरिएको गुजेश्वरी होटल प्रालिले नक्कली अनुभव पेश गरेको छ ।

ओम अस्पतालमा काम गरिरहेको भन्ने कागजात उक्त होटलका सञ्चालकले पेश गरे पनि ओम अस्पतालका प्रशासन स्रोतका अनुसार चमेनागृह सञ्चालनका लागि रमाइलो चौतारीका विजय खड्काले सम्झौता गरेका छन् । हाल रमाइलो चौतारीकै बिल आफूहरुले प्राप्त गरेको हुँदा अर्को सञ्चालक नभएको ओम अस्पतालका कर्मचारी इन्द्र बस्नेतले बताए । गुजेश्वरी होटलले खाद्य प्रविधि तथा गुण नियन्त्रण विभागबाट कुनै प्रमाण पनि नलिएको बताइन्छ । तथापि उहि फर्मलाई बीर अस्पतालको क्यान्टिन सञ्चालनका लागि आशीर्वाद प्राप्त भएको छ ।

वीर अस्पतालमा चमेनागृह सञ्चालनका लागि सुरुदेखि नै चलखेल भएको हुँदा आफूले उजुरी दिएको तर, कतैपनि सुनुवाई नभएको सुनिल क्यान्टिन तथा खुद्रा कपडा पसलका सञ्चालकले बताए । उजुरीमा आर्थिक चलखेलकै कारण मापदण्ड बिपरीतको कम्पनीलाई स्वीकृति दिएकोमा आफूहरु कानूनी उपचारका लागि जान तयार भएको बताएका छन् । उनको भन्दा हाल स्वीकृति दिइएको गुजेश्वरी होटल प्रालिको दररेट उच्च छ ।

वीर अस्पतालमा मासिक भाडा २ लाख ४५ हजार भनिए पनि खानाका अन्य परिकारहरुमा सस्तो दररेटमा उपलब्ध गराउनुपर्ने हुन्छ । तर, कम दररेटको अर्को प्रतिस्पधिलाई नदिएर उपकुलपति प्रा.डा. भूपेन्द्र बस्नेत, प्रशासनका उपसचिव सीताराम खड्का, लेखाअधिकृत महानराज ओलीलगायतका टीम आर्थिक प्रलोभनमा फस्न पुगेको बताइन्छ । चमेनागृह सञ्चालनका लागि उपकुलपति बस्नेतले सिधै डिल गरी दोस्रो नम्बर प्राप्त फर्मलाई उक्त चमेनागृह सञ्चालन गर्न दिइएको छ । यस विषयमा सूचना अधिकारी तथा उपसचिव सीताराम खड्कासँग प्रतिक्रियाका लागि सम्पर्क गर्दा उनी एक घण्टापछि कुरा गर्नू भन्दै पन्छिए ।

बिरामी र कुरुवाहरुले खाने अस्पतालका कतिपय चमेनागृह सञ्चालनमा ठूलो रकमको चलखेल हुँदै आएको छ । खासगरी यो प्रचलन सरकारी अस्पतालमा अझ बढी छ । निजी अस्पतालहरु न्यूरो अस्पताल बाँसबारी, बयोधा अस्पताल जस्ता अस्पतालमा भन्दा पनि केही सरकारी अस्पतालको खानाको दररेट बढी छ । शिक्षण अस्पताल महाराजगञ्जमा खाना गुणस्तरहीन भएको भन्दै पटक पटक सिल मारिएको छ । तर, पनि प्रशासनका कर्मचारीको अवैध आर्थिक चलखेलका कारण तिनै व्यक्तिहरु हावी हुँदै आएका छन् ।

देशको जेठो अस्पताल वीर अस्पतालको चमेनागृह सञ्चालनमा पनि पछिल्लो समयमा ठूलो चलखेल हुँदैछ । गुजेश्वरी होटल प्रालिलाई बोलपत्र स्वीकृति दिँदा नै करोडौं रकमको चलखेल भएको एक प्रतिस्पर्धीले लिखित उजुरी नै हालेका छन् । २०७१ सालमा कान्ति बाल अस्पतालमा चमेनागृह सञ्चालन गर्दा उक्त होटलले जथाभावी मुल्य लिने गरेको, म्याद नाघेको सामान, लेवल नभएका सामान बिक्री गरेको फेला परेको थियो । उक्त समयमा वाणिज्य, आपूर्ति तथा उपभोक्ता संरक्षण विभागका निर्देशक हरिनारायण बेल्बासेको नेतृत्वमा अनुगमन गरिएको थियो । तथापि वीर अस्पताल प्रशासनले त्यही होटललाई चमेना गृह सञ्चालनार्थ चावी सुम्पिएको एक दैनिकमा सूचना प्रकाशन गरिएको छ ।