निर्वाचन परिणामपछि आत्मसमीक्षा गर्दै पार्टी पुनर्गठन गर्न नारायणकाजी श्रेष्ठको प्रस्ताव

काठमाडौँ । नेपाली कम्युनिस्ट पार्टीका नेता नारायणकाजी श्रेष्ठले हालैको निर्वाचन परिणामपछि पार्टीले गम्भीर आत्मसमीक्षा गर्दै नयाँ नीति र योजनासहित अघि बढ्नुपर्ने बताएका छन्।

उनका अनुसार वर्तमान परिस्थितिको वस्तुनिष्ठ विश्लेषण र मूल्यांकन गर्दै संगठनलाई पुनर्गठन गर्ने आवश्यकता रहेको छ। यस क्रममा उपयुक्त रणनीति र कार्यनीति निर्धारण गर्दै एकता, ध्रुवीकरण, सहकार्य तथा संयुक्त मोर्चाको आधारमा समग्र रूपान्तरणको प्रक्रिया अघि बढाउनुपर्ने उनले उल्लेख गरेका छन्।

श्रेष्ठले पार्टीलाई पुनः सुदृढ बनाउँदै देश र जनताको पक्षमा संघर्षको स्पष्ट कार्यक्रम तय गर्नुपर्ने धारणा व्यक्त गरेका छन्। क्रान्तिनिष्ठा, धैर्य, विवेक र साहसका साथ दृढतापूर्वक अघि बढ्ने संकल्प गर्नुपर्ने उनले बताएका छन्।

उनले पार्टीको राजनीतिक कार्यदिशा शान्तिपूर्ण परिवर्तनमा आधारित रहेको उल्लेख गर्दै निर्वाचन र सरकारमार्फत गरिने कामलाई महत्त्वपूर्ण मानिए पनि त्यसलाई मात्र सम्पूर्ण उपायका रूपमा नलिनुपर्ने बताएका छन्।

उनका अनुसार शान्तिपूर्ण राजनीतिक मार्गअन्तर्गत सरकार, संसद् र सडक संघर्ष तीनै मोर्चाको भूमिका रहनेछ। तत्कालीन राजनीतिक परिस्थिति अनुसार कहिले कुन मोर्चा प्रमुख हुने भन्ने विषय निर्धारण हुने उनले बताएका छन्।