हामीलाई मतदाताले गम्भीर सन्देश दिएका छन्: पूर्णबहादुर खड्का

काठमाडौं । नेपाली कांग्रेसका नेता पूर्णबहादुर खड्काले अस्वाभाविक महत्त्वाकाङ्क्षा, आवेग र आग्रहबाट मुक्त भएर बृहत् एकताका साथ अघि बढ्नुपर्ने बताएका छन् । फागुन २१ को प्रतिनिधिसभा निर्वाचन परिणामले कांग्रेसलाई गम्भीर सन्देश दिएको उल्लेख गर्दै उनले यस्तो बताएका हुन् ।

चुनावी परिणामपछि सामाजिक सञ्जालमा लेख्दै नेता खड्काले भनेका छन्, “प्रतिनिधिसभाको निर्वाचन परिणामले विभिन्न तह र जिम्मेवारीमा क्रियाशील हामी कांग्रेसीलाई गम्भीर सन्देश दिएको छ । हाम्रा मतदाताको निर्णयबाट यो पाठ प्राप्त भएको हो ।”

खड्काले अब आवेग, उत्तेजना र बदलाको भावनाबाट मुक्त भएर अत्यन्त संयम र जिम्मेवारीबोधका साथ अघि बढ्नुपर्नेमा जोड दिएका छन् । “हामी सबैले ‘म म’ भन्दै विगतको निर्मम समीक्षा गरौँ,” उनले लेखेका छन्, “अस्वाभाविक महत्त्वाकाङ्क्षा र आग्रहबाट मुक्त भई पार्टीको बृहत् एकताका लागि निष्ठाका साथ अगाडि बढ्नु हाम्रो नैतिक कर्तव्य हो । हाम्रा अगाडि खडा भएको हिमालयतुल्य चुनौती सामना गर्ने उपयुक्त बाटो यही नै हो ।”

यसैबीच, सभापति थापाले चुनावी पराजयको जिम्मेवारी लिँदै पदबाट राजीनामा दिने तयारी गरेका छन् । उनले यसबारे उपसभापति विश्वप्रकाश शर्मासँग परामर्श गरे पनि शर्माले भने तत्काल राजीनामा नदिन सुझाव दिएका छन् ।