समानुपातिक सांसदलाई चैत्रको पहिलो सातामै प्रमाणपत्र दिने आयोगको तयारी

काठमाडौं । निर्वाचन आयोगले प्रतिनिधिसभा निर्वाचनको समानुपातिकतर्फका सांसदलाई चैत पहिलो साताभित्र प्रमाणपत्र दिइसक्ने बताएको छ ।

२१ फागुनमा सम्पन्न निर्वाचनको मतगणना अन्तिम चरणमा पुगेका बेला आयोगले चैत्रको पहिलो साताभित्र समानुपातिकतर्फ निर्वाचित हुनेहरूलाई प्रमाणपत्र दिने बताएको हो । आयोगका प्रवक्ता नारायणप्रसाद भट्टराईले सम्पूर्ण कामहरु चैत्रको पहिलो साताभित्र सम्पन्न भइसक्ने जानकारी दिएका हुन् ।

उनले मंगलबारसम्म समानुपातिकतर्फको सबैतिर गणना भइसक्ने अनुमान आयोगले गरेको बताए । प्रवक्ता भट्टराईले मतगणना सम्पन्न भइसकेपछि खसेको सदर मतको प्रतिशतका आधारमा सम्बन्धित दलले प्राप्त गरेको मतको प्रतिशतका आधारमा समानुपातिक बन्द सूचीबाट छनोट हुने उम्मेदवारको नामावली सम्बन्धित दलहरूसँग माग गरिने जानकारी दिए ।

त्यसपछि दलहरूबाट प्राप्त भएका नामलाई क्लस्टरअनुसार रुजु गर्दै निर्वाचित हुने सदस्यहरूको छनोट गर्ने र आयोगमा प्रमाणपत्र दिइने उनले बताए । निर्वाचनमा प्रत्यक्ष र समानुपातिक दुवैतर्फ रास्वपाको अग्रता रहेको छ ।