एमालेजनलाई योगेश भट्टराईको अपिलः हामी ढलेकामात्र हौं, मरेका होइनौं, संयम र धैर्यताकासाथ अगाडि बढौं

काठमाडौं । नेकपा (एमाले)का उपमहासचिव योगेश भट्टराईले पार्टी पंक्तिलाई संयम र धैर्यताकासाथ पार्टीको एकता जोगाउन र सही मार्गमा अघि बढ्न आग्रह गरेका छन् । उनले सम्पूर्ण एमालेजनलाई आत्मभत्र्सना होइन, आत्मसमीक्षाको बाटोमा हिंड्न अपिल गरेका छन् ।

उनको अपिलमा उल्लेख छ–हामी ढलेकामात्र हौं , मरेका होइनौं । सही नीति, सही संगठन, सही नेतृत्व, सही व्यवहार र सही कार्यशैली मार्फत हामी उठ्नेछौं र पार्टी, जनता र राष्ट्रको स्वाभिमानलाई फेरि उठाउनेछौं ।

सोमबार नेता भट्टराईले सामाजिक संजालमा लेखेको अपिलमा उल्लेख छ– ‘पार्टीले सामना गर्नुपरेको अवस्था र असफलता सिंगो पार्टीको असफलता हो । सामूहिक बुद्धि–विवेक र सामूहिक पहलबाट मात्र यो अवस्थालाई बदल्न सकिन्छ । तसर्थ, म सबै नेता कमरेडहरू र सिंगो पार्टी पंक्तिलाई हिजोका गुट (समूह)का घेराबाट बाहिर निस्केर खुला खुलस्त बहसमा सहभागी हुन आह्वान गर्दछु । साथै पार्टी, जनसंगठन र प्रवासका तहगत कमिटी र सदस्य कमरेडहरुलाई आफना राय सुझावहरू पार्टी नेतृत्व समक्ष पठाउन अनुरोध गर्दछु ।

विगत तीन दिनयता करिब हजार जनासँग फोनमा कुरा भयो । त्यत्तिकै संख्यामा म्यासेज हेरेको छु । त्यसमा अधिकांश पार्टीका कमरेडहरू र केही शुभेच्छुक मित्रहरू रहनुभएको छ । कुराकानीका क्रममा सुझाब, टिप्पणी, बिरोध, आक्रोश, हतासा, निरासा, संभावना, उपाय, दृढ़ता, जोशलगायतको मिश्रित र विविधतायुक्त धारणाहरू पाएको छु । बोल्नुपर्यो, पहल लिनुपर्यो भनेर प्रेरणादायी अनि दबाबयुक्त कुरा पनि सुनेको छु ।

विस्तृतमा केही दिन पछि भन्नेछु । अहिलेलाई मेरा प्रारम्भिक बिचार निर्वाचनमा आफ्नो मतमार्फत् जनताले हाम्रो नीति र नेतृत्वलाई शान्तिपूर्ण रूपमा अस्वीकृति गरेका छन् । यो आजको वस्तुगत यथार्थ हो । हामीले आफूभित्र सर्वाङ्गीण रूपान्तरण मार्फत् जनसमर्थन पुनः आर्जनको बाटो लिनुपर्दछ ।

मूलतः भदौ २३ र २४ पछि हाम्रो पार्टीले लिएका नीति ठिक छैनन्, त्यसमा करेक्सन गरौं भनेर हामीले नेतृत्व र सिंगो पार्टी पंक्तिलाई बैठक, भेटघाट र महाधिवेशनमार्फत् पटक–पटक अनुरोध गर्यौं तर सफल भएनौं । अब पुनः छलफल र बहस खुला गर्नुपर्दछ ।

हरेक सार्वजनिक संस्था–संगठनमा जिम्मेवारी र जवाफदेहीता अहम् महत्वको सवाल हुने गर्दछ । नेकपा एमाले यो अवस्थामा आउनुमा पार्टीले लिएका नीतिमात्र होइन, जिम्मेवारीमा रहेका तहगत कमिटी र नेताहरू सबैले भागीदारी बोक्नुपर्दछ । त्यसमा पनि नीतिगत र कार्यकारी भूमिकामा रहेको केन्द्रीय कमिटी, केन्द्रीय सचिवालयले नै जस अपजसको भारी बोक्नुपर्दछ । यो सबैको जवाफदेहिता फेरि पनि प्रमुख नेताकै रहन्छ । सफलता वा असफलतापछिको जवाफदेहिताको कार्यान्वयन कसरी हुन्छ ? पूर्वाग्रह, भावना र षड्यन्त्रको सिद्धान्तबाट माथि उठेर पार्टीभित्र यसमा गम्भीर छलफल गर्नुपर्दछ ।

पार्टीले सामना गर्नुपरेको अवस्था र असफलता सिंगो पार्टीको असफलता हो । सामूहिक बुद्धि–विवेक र सामूहिक पहलबाट मात्र यो अवस्थालाई बदल्न सकिन्छ । तसर्थ, म सबै नेता कमरेडहरू र सिंगो पार्टी पंक्तिलाई हिजोका गुट (समूह)का घेराबाट बाहिर निस्केर खुला खुलस्त बहसमा सहभागी हुन आह्वान गर्दछु । साथै पार्टी, जनसंगठन र प्रवासका तहगत कमिटी र सदस्य कमरेडहरुलाई आफ्ना राय सुझावहरू पार्टी नेतृत्व समक्ष पठाउन अनुरोध गर्दछु ।

कमरेडहरू, हामी ढलेकामात्र हांै, मरेका होइनौं । सही नीति, सही संगठन, सही नेतृत्व, सही व्यवहार र सही कार्यशैली मार्फत हामी उठ्नेछौं र पार्टी, जनता र राष्ट्रको स्वाभिमानलाई फेरि उठाउनेछौं । संयम र धैर्यताकासाथ पार्टीको एकता जोगाउन र सही मार्गमा अघि बढ़न र आत्मभत्र्सना होइन आत्मसमीक्षाको बाटोमा हिंड्न म नेकपा एमालेका सम्पूर्ण कमरेडहरूलाई हार्दिक अपिल गर्दछु ।

राजनीतिक दल एउटा सार्वजनिक संस्था हुनुको नाताले नेकपा (एमाले)का बारेमा आफना सुझाव, आलोचना र टिप्पणीहरू पठाउन समस्त बुद्धिजीवी मित्रहरू र आम जनसमुदायमा हार्दिक अपिल गर्दछु ।

अन्तमाः राष्ट्रिय एकता र नेपाली सार्वभौमिकताको रक्षा तथा बाम– लोकतान्त्रिक विचारधाराको रक्षा आजको साझा राष्ट्रिय कार्यभार हो । यसका लागि जनादेशको सम्मान र सम्बद्ध राजनीतिक बिचार र शक्तिका बिचका सकारात्मक सहकार्यका लागि सबैमा अपिल गर्दछु ।’