आज मध्यरातदेखि मौन अवधि लागू हुने, चुनाव प्रचार प्रसारको अन्तिम दिन

काठमाडौं । तीन दिनपछि हुने प्रतिनिधिसभाको निर्वाचनको मौन अवधि आज मध्यरातदेखि सुरु हुँदैछ । राजनीतिक दल तथा उम्मेदवारहरूले आजसम्म मात्र चुनाव प्रचारप्रसार गर्न पाउनेछन । सोमबार राति १२ बजेदेखि प्रचारका सबै गतिविधिमा पूर्ण प्रतिबन्ध लाग्नेछ ।

निर्वाचन आयोगका अनुसार मौन अवधि मतदान हुने दिनभन्दा अघिल्लो ४८ घण्टादेखि सुरु भई मतदान केन्द्र बन्द नहुन्जेलसम्म अनिवार्य रूपमा पालना गर्नुपर्ने व्यवस्था छ । मौन अवधिमा कुनै पनि प्रकारका चुनावी सभा, सम्मेलन, अन्तक्र्रिया, गोष्ठी, कार्यशाला वा मत माग्ने गतिविधि गर्न पाइँदैन ।

आयोगले स्पष्ट पारेअनुसार मतदान हुने दिनभन्दा ४८ घण्टाअघि नै मतदान स्थलको तीन सय मिटर वरिपरि राखिएका राजनीतिक दल वा उम्मेदवारका प्रचार सामग्री हटाउनुपर्नेछ ।

साथै सामाजिक सञ्जाल, सञ्चार माध्यम वा अन्य कुनै पनि विधि–प्रक्रियामार्फत मत माग्न तथा प्रचारप्रसार गर्न कडाइका साथ निषेध गरिएको छ ।

कार्यवाहक प्रमुख निर्वाचन आयुक्त रामप्रसाद भण्डारीले मौन अवधिमा आचरणविपरीत गतिविधि गरेको पाइए कडा कारबाही गरिने चेतावनी दिएका छन्। उनका अनुसार नियम उल्लङ्घन गर्ने उम्मेदवारको मनोनयन नै रद्द हुनसक्ने प्रावधान छ ।

निर्वाचनलाई स्वच्छ, निष्पक्ष र मर्यादित बनाउन मौन अवधिको कडाइपूर्वक पालना गर्न आयोगले सबै राजनीतिक दल, उम्मेदवार र मतदातालाई आग्रह गरेको छ ।